दक्षिण एसियाली आईटीएफ तेक्वान्दोको तयारी पूरा⚡हरिबोधनी एकादशी आज : तुलसी विवाहदेखि माङ्गलिक कार्यको शुभारम्भसम्म⚡महायज्ञमा रोका परिवारको प्रेरणादायी सहयोग : शिक्षा सुधारका लागि १६ लाख ६६ हजार ६६६ रुपैयाँ दान⚡सौन्दर्य व्यवसायमा स्प्राकलको छलाङ, पहिलो र दोस्रो शाखा दुवै महराकै हातबाट उद्घाटन⚡बहिरा फुटबल टोली दक्षिण कोरिया जाने⚡जिग्री सेकुवाको १०औँ तथा सबैभन्दा ठूलो आउटलेट धुम्बाराहीमा⚡दोहामा एनआरएनए मध्यपूर्व सम्मेलनको तयारी अन्तिम चरणमा⚡अभियान लघुवित्तको वार्षिकोत्सवमा वृद्धाश्रमलाई खाद्यान्न सहयोग⚡कर प्रणालीलाई लगानी, उत्पादन र रोजगारी प्रवर्द्धनको माध्यम बनाउनुपर्छ : चेम्बर अध्यक्ष अग्रवाल⚡पश्चिमी वायुको प्रभाव कायमै, हिमाली क्षेत्रमा वर्षा र हिमपातको सम्भावना

मुग्लिन–नारायणगढ सडक खण्ड निर्माणमा ढिलाइ

न्यूजलाईन्स् मिडिया संवाददाता
प्रकाशित मिति : २०७४ पुष ८ गते, शनिबार ९:५२

दीपेन्द्र अधिकारी/चितवन-मुग्लिन नारायणगढ सडक खण्डको स्तरोन्नतिमा देखिएको ढिलाइका कारण यात्रुहरू मारमा परेका छन् । सडक निर्माणको ६८ प्रतिशत काम सकिए पनि ३२ प्रतिशत काम बाँकी नै रहेको आयोजनाका सूचना अधिकारी इन्जिनियर शिव खनालले बताए ।

‘पुस पहिलो हप्तासम्ममा ८१ प्रतिशत काम सम्पन्न गर्ने लक्ष्य राखिएकोमा ६८ प्रतिशत मात्र काम भएको छ । अब दुई महिनामा ३२ प्रतिशत काम सक्न मुस्किल छ,’ उनले भने । अबको दुई महिनाभित्र सडकको स्तरोन्नति गरिसक्ने लक्ष्य राखिएको थियो ।

राजधानी जाने र बाहिरिने मुख्य मार्ग भएकाले यो सडकको स्तरोन्नति सरकारको उच्च प्राथमिकतामा परेको छ । तर, सडक निर्माणको ठेक्का लिएका कम्पनीहरूले समयमै काम गरिरहेका छैनन् । सन् २०१७ अप्रिलसम्ममा सक्ने गरी दुई वर्षको अवधि राखेर नेपाल र भारतका तीनवटा निर्माण कम्पनीलाई सो सडकको ठेक्का दिइएको थियो ।

त्यसपछि तीनपटकसम्म सडक निर्माणको मिति थप गरिसकिएको छ । अन्तिमपटक थपिएको म्याद सकिन अब केवल दुई महिना बाँकी छ । आगामी फागुनको पहिलो हप्तामै सकिने गरी सम्झौता भए पनि काम भने सुस्त गतिमा भइरहेको इन्जिनियर खनालले बताए ।

पटक–पटकको पहिरो, वर्षा, दुईपटकको निर्वाचनलगायतका कारण काम रोकिएको र समयको म्याद थप गर्न बाँकी रहेकाले अब बढीमा ४५ दिनसम्म म्याद थप हुन सक्ने हुँदा चैत मसान्तसम्ममा सडक सम्पन्न गर्नैपर्ने बाध्यता छ । खनालका अनुसार लक्ष्यअनुसारको काम नगरेकाले मंसिर महिनामा कम्पनीहरूले पाउने भुक्तानीबाट जरिवाना असुल गरिएको छ । पहिलो खण्डको ६१ करोड रुपैयाँ, दोस्रो खण्डको ९८ करोड रुपैयाँ र तेस्रो खण्डको एक अर्ब ३१ करोड रुपैयाँमा ठेक्का दिइएको खनालले बताए ।

७५ लाख जरिवाना
नारायणगढ–मुग्लिन सडक खण्डमा तोकिएको समयमा काम पूरा नगर्ने ठेकेदार कम्पनीबाट ७५ लाख रुपैयाँ जरिवाना असुल गरिएको खनालले बताए । पहिलो र तेस्रो खण्डको जिम्मेवारी पाएका दुई निर्माण कम्पनीबाट जरिवाना असुल गरिएको हो ।

आयोजनाका इन्जिनियर शिव खनालका अनुसार पहिलो खण्ड निर्माणको जिम्मा लिएको बिएलए-श्रेष्ठ जेभी निर्माण कम्पनी र तेस्रो खण्ड जिम्मा लिएको सुप्रिम रौताहा जेभी निर्माण कम्पनीबाट जरिवाना असुल गरिएको हो । बिएलए-श्रेष्ठ निर्माण कम्पनीबाट आठ लाख रुपैयाँ र सुप्रिम-रौताहा निर्माण कम्पनीबाट ६७ लाख रुपैयाँ जरिवाना असुल गरिएको छ ।

भूकम्प, नाकाबन्दी, चक्का जामलगायत कारणले थप भएको समयसीमामा पनि काम सम्पन्न
नगरेपछि उनीहरूलाई जरिवाना गरिएको हो । खनालका अनुसार ठेक्का दिँदाको समयलाई तीन भागमा विभाजन गरेर पहिलो आठ महिनामा १५ प्रतिशत, दोस्रो आठ महिनामा ५० प्रतिशत र तेस्रो आठ महिनामा बाँकी काम सम्पन्न गर्नुपर्ने सर्त राखिएको थियो ।

१३ किमी मात्रै कालोपत्रे
कुल ३२ दशमलव दुई किमी लम्बाइ रहेको सो सडकको १३ दशमलव पाँच किमी सडक खण्ड मात्रै कालोपत्रे भएको छ । १९ किमी भागको कालोपत्र र ८०० मिटर भित्तो काट्ने काम बाँकी नै छ ।

सडकलाई तीन खण्डमा विभाजित गरिएको छ । त्यसमध्ये, पहिलो खण्डमा ६७ दशमलव एक प्रतिशत, दोस्रो खण्डमा ६९ दशमलव पाँच प्रतिशत र तेस्रो खण्डमा ५८ प्रतिशत मात्रै काम सम्पन्न भएको छ । सडकको १६ किलोदेखि मुग्लिनसम्म नौ मिटर फराकिलो र १६ किलोदेखि आँपटारीसम्म ११ मिटर फराकिलो सडक निर्माण गरिँदै छ । एसियन हाइवेअन्तर्गतको एएच ४ टु खण्डअन्तर्गत नारायणगढ–मुग्लिन सडकखण्ड पर्छ ।-नयाँ पत्रिका

फेसबुक प्रतिक्रिया
सम्बन्धित शीर्षकहरु