बुटवल-भौतिक पूर्वाधार तथा यातायात मन्त्री रघुवीर महासेठले सिद्धार्थ राजमार्ग अन्तर्गत बुटवलको चिडियाखोलादेखि दोभानसम्म सुरुङमार्ग निर्माण आगामी साउनदेखि सुरु गर्ने बताएका छन् ।सिद्धबाबा सडक खण्डको बुधबार स्थलगत अवलोकनपछि मन्त्री महासेठले सुरुङ निर्माणको काम अार्थिक वर्ष २०७५/७६ को सुरुदेखि नै हुने बताएका हुन् ।उनले एक हप्ताभित्र प्रतिवेदन बुझाउन सम्बन्धित विभागका प्रतिनिधिहरुलाई निर्देशन समेत दिए । ‘एक हप्ताभित्र प्रतिवेदन आउनुपर्छ र नयाँ आर्थिक वर्षबाट काम सुरु हुन्छ’-मन्त्री महासेठले भने ‘अहिलेको सरकारले वजेटमा उल्लेख गरेका योजनाहरु देखाउनका लागि हैन,काम पुरा गर्नका लागि हो, ढुक्क हुनुहोस् ।’
मन्त्री महासेठले ५ वर्षभित्र प्रतिव्यक्ति आय दोब्बर बनाउने सरकारको लक्ष्य पूरा गर्न सडकहरु सुरक्षित र फराकिला बनाउनु पर्नेमा जोड दिए । ‘सांसद, सचिव र महानिर्देश, सीडीओलाई साक्षी राखेर भन्दैछु, अब काम शुरु भयो’ मन्त्री महासेठले भने ‘पहिलाका सरकार र अहिलेका सरकारमा धेरै फरक छ, यो कुरा काम शुरु भएपछि ३-४ महिनामै थाहा पाउनुहुनेछ ।’पाल्पाका प्रतिनिधि सभा सांसद सोमप्रसाद पाण्डेले तल्लो सिद्धबाबादेखि माथिल्लो सिद्धबाबा र त्यसमाथिको ३ किलोमिटर सडक क्षेत्र अति जोखिमयुक्त भएकाले आफूले संघीय संसदमा आवाज उठाएको र वजेट पुस्तकमा पार्न अर्थमन्त्री र प्रधानमन्त्रीलाई लिखित अनुरोध गरेको बताए ।
वर्तमान सरकारले सिद्धबाबासहित विभिन्न सात स्थानमा सुरुङ मार्ग बनाउने वजेट भाषणमा उल्लेख गरेको छ । मन्त्री महासेठसंगै मन्त्रालयका सचिव, सडक विभागका क्षेत्रीय निर्देशक लगायत प्राविधिक टोली आएको थियो ।यो तीन किलोमिटर क्षेत्रमा वषर्ायाममा मात्र होइन, हिउँदमा पनि ढुंगे पहिरो खसेर थुप्रैले अकालमा ज्यान गुमाइरहेका छन् । यो ३ किलोमिटर क्षेत्रमा मात्रै १ सय १३ वटा साना ठूला पहिरो खसेका छन् ।
यो सडक खण्डमा माथिबाट ढुंगे पहिरो खस्दा र दुर्घटना भएर पछिल्लो १० वर्षमा करिब ७० जनाले ज्यान गुमाएका छन् । १० वर्षको अवधिमा यहाँ १८ वटा बस,७ वटा ट्रक, कार जीप ९ वटा र १९ वटा मोटरसाइकल दुर्घटनामा परेका छन् ।यो सडक खण्डलाई सुरक्षित बनाउने विकल्पका बारेमा एक दशकदेखि वहस हुँदै आएको छ । तर ठोस काम शुरु हुन सकिरहेको छैन ।
-onlinekhabar
२०८० मंसिर २१ - बिहीबार
