काठमाडौँ – राष्ट्रपति विद्यादेवी भण्डारीले पहिलोपटक ‘शीतल निवास टु एयरपोर्ट’ हेलिकप्टर यात्रा गरेकी छन् ।
ट्राफिक व्यवस्थालाई मध्यनजर गर्दै राष्ट्रपति भण्डारीले कलसाइन ९ एन– आरएममार्फत त्रिभुवन विमानस्थल पुगेकी हुन्। राष्ट्रपति भण्डारी बुधबार म्यानमार प्रस्थान गर्दैछिन्।
भिआइपी र भिभिआइपीहरूको सवारीका कारण सर्वसाधारणले सास्ती खेप्नु परेको गुनासो बढेपछि राष्ट्रपति भण्डारीले आज हेलिकप्टर प्रयोग गरेको बताइएको छ।
नेपाली सेनाले एक अर्ब ७० करोड रुपैयाँमा भिभिआइपीका लागि एडब्लु १३९ मोडलको कलसाइन ९ एन– आरएम हेलिकप्टर खरिद गरेको थियो । इटालीको लियोनार्दो कम्पनीले उत्पादन गरेको यो हेलिकप्टर १५ सीट क्षमताको रहेको छ ।
