१० फागुन, काठमाडौं । प्रथम महिला राधिका शाक्यको आत्मकथा ‘करुणा’ लोकार्पण भएको छ ।
शनिबार यहाँ आयोजित समारोहमा प्रधानमन्त्री केपी शर्मा ओली, लेखक शाक्य, नेकपा एमालेका उपमहासचिव प्रदीप ज्ञवाली, साहित्यकार अमर न्यौपाने र गायिका आनी छोइङ डोल्माले आत्मकथा लोकार्पण गरे ।
प्रधानमन्त्री ओली र प्रथम महिला शाक्य दाम्पत्य जीवनमा बाँधिएको ३७औं वार्षिकोत्सवका अवसरमा पाणिनी बुक्स प्रालिद्वारा प्रकाशित पुस्तकको लोकार्पण समारोह आयोजना गरिएको थियो ।
समारोहमा मन्त्रिपरिषद सदस्यका साथै समाजका प्रतिष्ठित व्यक्ति सहभागी थिए ।
लेखक शाक्यले आत्मकथामा आफ्नो दृष्टि, भोगाइ र अनुभूतिसँगै प्रधानमन्त्री ओलीको संघर्ष, कठिनाइ, सफलता र समाजसेवाका विषय समेटिएको बताइन ।
पुस्तकमा शाक्यको बाल्यकाल, पढाइ, जागिर र जीवनका उकाली–ओराली तथा नेता ओलीसँग विवाह बन्धनमा बाँधिएपछिका अनेक प्रसङ्ग उल्लेख छन ।
‘म साहित्यकार, न लेखिका हुँ । त्यही पनि मनमा लागेका आफ्ना विचार कहिलेकाही लेख्ने गर्थें । त्यसैलाई आज पुस्तकका रूपमा ल्याएको छु,’ शाक्यले भनिन्, ‘म बाल्यकालदेखि नै गरिब, दुःखी, रोगी असहायलाई देखेपछि चिन्तित हुन्थें । मैले तत्कालीन समयको केपीसँग पनि त्यही कारणले विवाह गरें ।’
कार्यक्रममा आयोजकका तर्फबाट प्रधानमन्त्री ओली र प्रथम महिला शाक्यलाई विवाह वर्षगाँठका अवसरमा सम्मान गरिएको थियो ।
२०८१ फाल्गुन १० - शनिबार
