फिदिम : पाँचथरसँग सीमा जोडिएको इलामको थाक्फोकथुम गाँउपालिकाको इम्ब्रीङ भन्ने स्थानमा भेटिएको बमलाई नेपाली सेनाको भैरबी दल गणको बम डिस्पोजल टोलिले डिस्पोज गरेको छ। पाँचथरको सप्तमी बजार नजिकै राँके रबी सडक खण्डमा राखिएको बमलाई सेनाले डिस्पोज गरेको भैरबी दल गणका गणपति सिवराम पन्तले जानकारी दिए।
सडकमा राखिएको बम स्थानीयले देखेर सुरक्षा निकायलाई खबर गरेपछि चुनाबका लागि खटिएको सेनाको टोली बम राखिएको स्थालमा पुगेर बम डिस्पोज गरेको हो। ‘घरेलु सामाग्रीमा विस्फोटक पदार्थ राखेर बम बनाइएको हो,’ गणपती पन्तले भने,‘बम विस्फोट हुन नपाउँदै सेनाले डिस्पोज गरेको छ।’
सडकमा बम भेटिएपछि चुनाबी प्रचारमा हिडेका प्रतिनिधि सभा सदस्य उम्मेदवार तथा कांग्रेस केन्द्रीय सदस्य भिष्मराज आङ्देम्बे सहितको टोली तीन घण्टा बाटैमा रोकिएको थियो। चुनाब हुन तीन दिन मात्र बाँकी रहदा पाँचथरको दक्षिणी क्षेत्र आवतजावत गरिने मुख्य सडकमै बम भेडिएपछि सर्वसाधारणहरु त्रसित बनेका छन् ।
यसअघि पनि सदरमुकम फिदिम बजार र हिलिहाङ गाँउपालिकाको चतुरे बजार नजिकै सडकमा भेटिएको बमलाई सेनाले निष्क्रिय पारेको थियो। निर्वाचन नजिकिदै जाँदा बम भेटिने क्रम रोकिएपछि सर्वसाधारणहरु त्रसित बनेका छन्। पटक पटक बम भेटिए पनि विष्फोट भएर क्षति भने हुन पाएको छैन।
