सुरक्षा भट्टराई-काठमाडौँ । नायिका आँचल शर्मा र नायक पल शाह बेलाबखत प्रेम जोडीका रूपमा चर्चामा आउँछन् । आँचल चलचित्र क्षेत्रमा नआउँदासम्म पलको नाम प्रकृती श्रेष्ठसँग जोडिएर चर्चामा आउने गर्थ्यो । प्रकृतीको विवाह पछि उनीसँगको च्याप्टर क्लोज भयो र पलले डेरा सरेका भन्दै पछिल्लो समय उनी आँचलसँग जोडिन्छन् ।
चलचित्र नाई नभन्नु ल–४ बाट नेपाली सिने दुनियाँमा प्रवेश गरेकी आँचलको स्क्रिन शेयरको संयोग नै पलसँग जुर्यो । त्यसैले पनि यो जोडी स्वाभाविक चर्चामा रह्यो । तर सोही चलचित्रमा अन्य दुई नायिका पनि पलसँग अभिनयमा थिए तर उनीहरूले आँचलको जस्तो पलसँग जोडिएर चर्चा पाएनन् ।
चलचित्र जोनी जेन्टलम्यानमा पनि आँचल र पलको जोडी जम्यो । तर चलचित्र भने चलेन । यो जोडीको अर्को चलचित्र पनि तयार हुँदैछ– सत्रु गते । छायाँकन भैरहेको चलचित्र सत्रु गतेको सुटिङमा यो जोडीको केमेस्ट्री व्यावहारिक रूपमै मिलेको चर्चा छ । उनीहरू एकअर्कासँग समय विताउन आकर्षित भएका र प्रायः घुमघाममा पनि सँगै निस्कने गरेका निकट स्रोत बताउँछ ।
यो जोडीलाई ‘आँप जोडी’ भनेर पनि सम्बोधन हुने गरेको छ । तर दुबै प्रेममा रहेको खुलस्त बताउन सक्दैनन् उल्टै प्रेम सम्बन्ध नरहेको जिकिर गर्छन् । साथी र सहकर्मी मात्रको सम्बन्ध रहेको उनीहरूले मिडियासँग धेरै पटक बताएका छन् ।
तर कतिसम्म भने पल र आँचलको ड्रेस कोड पनि मिल्ने गरेको छ । पछिल्लो समय उनीहरूले सल्लाह गरेरै मिल्दो पहिरनमा सार्वजनिक हुने गरेका चर्चा पनि चलेको छ । पल र आँचलको जोडी जति जमेको देखिन्छ उति रहस्यमयी पनि छ ।-dcnepal.com
२०८१ माघ ९ - बुधबार
