सुरक्षा भट्टराई काठमाडौँ – चलचित्र ‘कृ’को यतिबेला निकै चर्चा चुलिएको छ । चलचित्र रिलीज भएको धेरै समय बितिसक्यो तर यसको चर्चा सेलाउनुको सट्टा झनै बढ्दो छ । यति धेरै चर्चा चल्नुको कारण चलचित्र नभइ यसको गीत हो । जुन गीतले निकै विवाद निम्त्याएको थियो । गीतले यतिसम्म विवाद ल्यायो कि चलचित्रका निर्माता सुवास गिरीले जेलको हावा खानुपर्यो । उनलाई गीत चोरीको अभियोगमा प्रहरीले नियन्त्रणमा लिइ हिरासतमा राखेको थियो । हिरासतबाट निस्कनासाथ उनले राजधानीमा पत्रकार सम्मेलन गरेर आफूमाथि अन्याय भएको बताएका थिए ।
सम्झना चलचित्रका निर्माण शम्भु प्रधानले प्रहरीसँग मिलेर आफूलाई बिना कारण पक्राउ गराएको र जबरजस्ती ११ लाख रुपैयाँ तिराएको आरोप लगाएका थिए । उनले आफूलाई प्रहरीको आडमा प्रधानले ३ वटा सर्त मान्न बाध्य पारेको समेत बताएका थिए ।लगत्तै आज फिल्मको विवादित गीत युट्युबबाट बेपत्ता भयो । पुरानो विवादित गीत हटेसँगै युट्युबमा नयाँ गीत देखा पर्यो । नयाँ गीतको बाँकी शब्द उही थियो । विवादमा परेका शब्द मात्र गीतबाट हटाइएको थियो ।
फिल्म रिलिज भइसकेर अधिकांश हलबाट पनि हटिसकेपछि एक्कासी नयाँ गीत देखा पर्नु अस्वभाविक थियो । अचानक नयाँ गीत देखिएपछि लागी डिसी नेपालले चलचित्रका सह निर्माता भुवन केसीसँग सोध्दा उनले आफूलाई यसबारे जानकारी नै नभएको बताए ।डिसीनेपालको प्रश्नमा भुवनले भने ‘खै मलाई थाहा भएन । म क्याप्टेनको सुटिङमा छु । सुवास गिरीलाई सोध्नुस् है ।’ सहनिर्मातालाई थाहै नभइ गीत युट्युबमा आएपछि उनले भनेअनुसार निर्माण सुवास गिरीलाई सम्पर्क गर्दा अर्को रोचक घटना भयो । सुरुमा गिरीको मोवाइलमा फोनको घण्टी बज्यो । लगत्तै उनको फोन काटियो । फेरि फोन गर्दा उनको फोन अफ भइसकेको थियो । नयाँ गीत आएसँगै केही प्रश्नहरु उठेका छन् । ‘कृ’ टिमले प्रधानको शर्त मानेको हो वा यो झमेलाबाट उम्कन मात्रै यस्तो गरेको हो भन्ने प्रश्नको जवाफ भने अहिलेसम्म आएको छैन ।
भिडीयो:
