काठमाडौं- वरिष्ठ चिकित्सक उपेन्द्र देवकोटाको निधन भएको छ । वरिष्ठ न्यूरो सर्जन देवकोटाको सोमबार साँझ बाँसबारीस्थित न्यूरो अस्पतालमा निधन भएको हो ।
उनी पित्त थैलीको क्यान्सरबाट पिडित थिए । देवकोटा आफ्नै पहलमा स्थापना भएको बाँसबारीस्थित न्युरो अस्पताल उपचार गराउँदै आएका थिए । सहकर्मी चिकित्सकहरूले उनलाई यो धर्तीमा रहने अवधि कम रहेको बताइरहँदा उनी त्यसलाई ठाडै चुनौती दिइरहेका थिए । त्यही चुनौतीका साथ उनी अघिल्लव शुक्रबार गोर्खास्थित आफ्नै गाउँको पानी पिँढी बसेर पिउने इच्छा गरेपछि उनलार्इ हेलिकप्टरमा गोर्खा लगिएको थियो ।
एसियाकै चर्चित न्युरोसर्जन, जो एक्लैले आफ्नो करिअरको ३० वर्षको अवधिमा १८ हजारजनाको शल्यक्रिया गरिसकेका छन्, १० लाख बिरामीलाई जाँचिसकेका छन्, कैयौंलाई जीवन दिए ।
गोरखाको अमरज्योति जनता मावि लुईंटेलबाट विद्यालय शिक्षा पूरा गरेका उपेन्द्रले विद्यालय तह होस् या कलेज वा चिकित्साशास्त्रको पढाई, सधै अब्बल विद्यार्थीको रुपमा रहेका थिए ।
वीर अस्पतालमा २५ वर्ष सेवा गरेका उनी केही वर्षदेखि बाँसबारीस्थित न्युरो हस्पिटलमार्फत् बिरामीको सेवा गर्दै आएका थिए । ७ महिना स्वास्थ्यमन्त्री हुँदा उनले थुप्रै उदाहरीय काम गरेका थिए ।
