गर्मी अत्याधिक बढेमा तपाईं के गर्नु हुन्छ ? चिसो खानु होला, वा पंखा चलाउनु होला । यी बाहेक ‘एयर कन्डिशनर’ पनि अर्को विकल्प हुनसक्छ । ‘एयर कन्डिशनर’ को मुख्य काम भनेको कोठाको तापक्रम अनुकुल बनाउनु नै हो । तर एक अध्ययनले ‘एयर कन्डिशनर’ले गर्मी बढाइरहेको दाबी गरेको छ ।
बजारमा अत्यधिक माग रहेका विभिन्न ब्राण्डका ‘एयर कन्डिशनर’हरु पृथ्वीको तापमान बढाउन मुख्य कारक रहेको उक्त अध्ययनले जिकिर गरेको छ । वास्तवमा ‘एयर कन्डिशनर’ चलाउँदा विद्युतको खपत धेरै हुन्छ जसले गर्दा पर्यावरण थप उष्ण बन्दै गएको छ ।
वातावरणविद्का अनुसार यसैकारण सन् २ हजार पछिका १७ वर्षमध्ये १६ वर्षहरु अधिक गर्मी रहेका थिए । विभिन्न अन्तरराष्ट्रिय एजेन्सीका अनुसार सन् २०५० सम्ममा ‘एयर कन्डिशनर’ चलाउन आवश्यक हुने विद्युत आजको तुलनामा तीन गुणाले बढ्ने भनिएको छ ।
अर्थात, सन् २०५० सम्ममा विश्वभरका ‘एयर कन्डिशनर’ले खपत गर्ने बिजुली अहिले अमेरिका, युरोपेली संघ र जापानमा खपत भइरहेको बिजुलीको मात्रा बराबर हुन आउँछ ।
फ्लोरिडा विश्वविद्यालय सौर्य उर्जा केन्द्रका डेनी पार्कर साथीहरुसँग मिलेर लामो समयदेखि एयर कन्डिसनर र हिटिङ सिस्टम अझै धेरै प्रभावकारी बनाउने तरिका खोजिरहेका छन् । सन् २०१६ मा यस्तो एक यन्त्र पत्ता लगाइएको थियो, जसले पानीलाई वाष्पिकरणको माध्यमले चिसो बनाउँछ ।
यस यन्त्रलाई पारम्पारिक एयर कन्डिशनिङ युनिटको साथमा जोड्न सकिए यसले कम बिजुलीमा धेरै चिसो हावा दिन्छ । शोधकर्ताहरुका अनुसार युरोपेली मुलुकमा यसरी कुलिङ प्रणालीलाई ३० देखि ५० प्रतिशत सम्म राम्रो बनाउन सकिन्छ ।
प्रविधिको क्षेत्रको ठूलो कम्पनी सामसुङले विन्ड फ्रिनामको एक प्रविधि विकास गरेको छ जसले कोठाको तापक्रमलाई कम गरि कोठा चिसो बनाउँछ । सामसुङका अनुसार यो प्रविधि पारम्पारिक एयर कन्डिसनर भन्दा ३२ प्रतिशत फाइदाजनक छ । जसले वातावरणमा ‘एयर कन्डिशनर’को नकारात्मक प्रभावलाई न्यून गर्न मद्दत गर्ने छ ।।
२०८१ आश्विन ४ - शुक्रबार
