काठमाडौं-नेपाल बार एशोसिएशनका महासचिव खम्मबहादुर खातीले प्रस्तावित प्रधानन्यायाधीश दिपकराज जोशीलाई सुनुवाई समितिले न्यायालयलाई होच्याउनेगरि प्रश्न सोधेको गुनासो पोखे ।बिहीबार रिपोर्टर्स क्लब नेपालले आयोजना गरेको साक्षात्कारमा उनले भने,‘समितिका सदस्यहरुले जुन किसिमले प्रश्न सोध्नुभएको छ, यो अदालतलाई मानमर्दन र होच्याउनगरि सोधिएको छ । आज प्रश्न के हो भने हामी कस्तो पद्धती बसाल्न गैरहेका छौ भन्ने हो ।’
महासचिव खातीले प्रस्तावित प्रधान्यायाधीशको नाम समितिले अस्विकृत गरे उहाँको स्टाटस के हुने भन्दै प्रश्न समेत तेर्साए । उनले भने,‘उहाँको नाम अस्विकृत भयो भनेपनि उहाँ कायममुकायम प्रधानन्यायाधीश रहिरहनुहुन्छ। न्यायाधीको प्रमाणपत्रको बारेमा समितिलाई छलफल र अनुशन्धान गर्ने अधिकार छैन । हिजो ५ वर्षसम्म सर्वोच्चको न्यायाधीश हुँदा यो प्रश्न उठेन तर अहिले प्रधानन्यायाधीश हुन खोज्दा प्रश्न उठ्ने । यदि यो विषय उठ्यो भने संवैधानिक परिषद नै अयोग्य हुनेछ । किनकी संवैधानिक परिषदले तीन जनामध्ये जोशी नै योग्य र उपयुक्त व्यक्ति भनेर सिफारिश गरेको हो, यदि उहाँ अयोग्य हुनुहुन्थ्यो भने किन उहाँको नाम सिफारिश गर्यो त ? ।’
संविधान, ऐन र कानून विपरित गएर सरकारले स्वतन्त्र न्यायालयमाथि अंकुश लगाउने काम गर्न खोजेको उनको गम्भिर आरोप छ । उनले भने,‘सरकारले पार्टीको दृष्टिकोणले न्यायालयमा लविङ गर्यो । सरकारको यो गलत कदम देशको लागि भयानक र खतरनाक छ। सरकारसँग दुई तिहाई छ, त्यसैले उसले उत्तरदायीपूर्ण भूमिका निर्वाह गर्नुपर्छ ।’ अदालतलाई निर्देशित र नियन्त्रण गर्न खोजे यसले कसैलाई भलो नगर्ने उनको ठोकुवा छ ।
