काठमाडौं- लोकप्रिय रेष्टुरेन्टको रुपमा चर्चा कमाएको एलिस रेष्टुरेन्टले नेपालकै ठूलो पार्टी भेन्युको सुविधासहित राजधानीमा ‘एलिस रिसेप्सन’ सञ्चालनमा ल्याएको छ । यही असोज १२ गतेदेखि एलिस रिसेप्सन औपचारिक रुपमा सञ्चालनमा आएको हो । काठमाडौंको गैरीधारामा सञ्चालनमा आएको यो भेन्युमा पाँचतारे होटलमा उपलब्ध पार्टी हलको सुविधा पाइने बताइएको छ । नेपालमा सामान्य पार्टी प्यालेसमा जान नखोज्ने तर पाँचतारेमा पार्टी गर्न नसक्नेका लागि यो भेन्युको सञ्चालन गरिएको सञ्चालक नकुल शेरचनले बताए । गैरीधारामा रहेको एलिस रेष्टुरेन्टको १६ रोपनी जग्गामा एलिस रिसेप्सन खुलेको हो । डेढ वर्षअघिदेखि १७ करोड लगानी गरेर नेपालकै सबैभन्दा ठूलो पार्टी भेन्यु निर्माण भएको हो ।
‘एलिस रिसेप्सन पनि उच्च–मध्ययमवर्गलाई टार्गेट गरेर बनाइएको हो,’ शेरचनले भने । पाँचतारेको मेन्यु महँगो हुने, तर सुविधा कम हुने भएकाले पनि ग्राहकले विकल्प खोजिरहेका थिए । त्यही विकल्प दिन यसमा प्रवेश गरेको उनले बताए । ‘होटलसँग नाम चलेका कारण पाँचतारेका ब्याङ्केट चलिरहेका छन्, विकल्प नहुँदा कुर्नुपर्ने अवस्था पनि थियो,’ उनले भने, ‘अब हामी पाँचतारे सुविधासहित आएका छौं ।’ एलिस रिसेप्सनमा दुई सय कार अट्ने पार्किङ क्षमता छ । वरिपरिका रुखलाई जोगाएर निर्माण गरिएको भवनका बाहिरी र भित्री सजावट कलात्मक छ । शेरचन आफैं चीन पुगेर सजावटका सामान अर्डर गरेका थिए । भवनको बाहिरी भागमा मल्लकालीन इँट प्रयोग भएको छ । त्यही जग्गामा पुरानो दरबार भएका कारण त्यो भत्काउँदा निस्केका पाँच लाख इँटलाई शेरचनले ब्याङ्केट बनाउन प्रयोग गरेको बताए । फलस्वरुप भवनको बाहिरी भाग प्राचीन शैलीको देखिएको छ ।
ब्याङ्केटमा १५ सय जनालाई एकै पटक सेवा दिन सक्ने क्षमताको हलदेखि त्यहीँभित्र कार्यक्रम गर्नेका लागि बस्ने सुविधासहितको अपार्टमेन्ट पनि छ । एलिसको रेष्टुरेन्ट, ब्याङ्केटमा ठूलो लगानी गरेका शेरचनले अब चेन रुपमा एलिसलाई फैलाउने बताए । होटलमा पनि जाने योजना बुनिरहेका छन् । नयाँ अवधारणाको रेष्टुरेन्टमा पनि हात हाल्ने सोच रहेको शेरचन बताउँछन् । एलिसको सञ्जाल फैलिँदै छ । एलिस रिसेप्सनको बुकिङ खुला नगर्दै अहिले नै बुकिङ आइरहेको शेरचनले बताए । शेरचन जापानमा चौध वर्ष रेष्टुरेन्ट क्षेत्रमा अनुभव सँगालेका व्यक्ति हुन् । एलिसको गैरीधारा र दरबारमार्गमा दुईवटा रेष्टुरेन्ट सञ्चालमा छन् ।
श्राेतः janasawal.com