काठमाडौं : प्रमुख प्रतिपक्ष दल नेपाली कांग्रेसले निजगढ अन्तर्राष्ट्रिय विमानस्थल बन्न नदिन षडयन्त्र भइरहेको उल्लेख गर्दै सचेत रहन सरकारलाई आग्रह गरेको छ । राष्ट्रियसभामा प्रमुख प्रतिपक्ष दलका नेता तथा कांग्रेस नेता सुरेन्द्रराज पाण्डेले संघीय संसदको राष्ट्रिय सरोकार तथा समन्वय समितिको बैठकमा निजगढ अन्तर्राष्ट्रिय विमानस्थल बन्न नदिन षडयन्त्र भईरहेको दावी गर्दै सचेत रहन सरकारलाई आग्रह गरेका हुन्।
उनले विमानस्थल निर्माणका लागि सत्तापक्ष र प्रतिपक्ष मिलेर अघि बढनुको विकल्प नरहेको पनि स्पष्ट पारे । विमानस्थल अघि बढाउनका लागि सहज वातावरण बनाउन समितिले स्थलगत अवलोकनको काममा पनि ढिलाई गर्न नहुने प्रमुख प्रतिपक्ष दलका नेता पाण्डेको प्रस्ताव छ ।
सत्तारुढ नेपाल कम्युनिष्ट पार्टीका राष्ट्रियसभा प्रमुख सचेतक खिमलाल भट्टराईले बूढीगण्डकी जलविद्युत आयोजना निर्माणको काममा ढिलाई गर्न नहुनेमा जोड दिए । उनले निजगढ विमानस्थल निर्माण विवाद तत्काल समाधान गर्न सरकारलाई सचेत गराए ।
बैठकमा समितिकी सभापति दिलकुमारी रावलले दशैंं र तिहारको बीचमा निजगढ विमानस्थलको स्थलगत अवलोकनका लागि जाने गरी आवश्यक तयारी गर्न सचिवालयलाई निर्देशन दिएका छन् ।
श्राेतः janasawal.com
२०८१ चैत्र १२ - मंगलवार
