काठमाडौं,साफ यू-१८ महिला च्याम्पियनसिपअन्तर्गत शुक्रबार भएको सेमिफाइनलमा भारतलाई हराउँदै नेपाल फाइनलमा प्रवेश गरेको छ । टाइब्रेकरमा ३-१ ले भारतको चुनौती पन्छाउँदै नेपाल उपाधि नजिक पुगेको हो । भुटानको थिम्पुस्थित चाम्लिङथाङ रंगशालामा नेपालले उपाधिको दावेदार मानिएको भारतलाई निर्धारित समयमा १-१ को बराबरीमा रोक्दै ट्राइब्रेकरमा ३-१ ले पन्छाएको हो । निर्धारित ९० मिनेट र थपिएको ३० मिनेटमा पनि दुबै पक्षबाट १-१ गोलको बराबरी भएपछि खेलको निर्णय पेनाल्टीबाट गराइएको थियो । रश्मी कुमारी घिसिङले गोल गर्दै नेपाललाई सुरूवाती अग्रता दिलाएकी थिइन्। रेखा पौडेलको थ्रु पासलाई सदुपयोग गर्दै उनले पेनाल्टी क्षेत्रभित्रबाट सहजै गोल गरेकी थिइन्। पहिलो हाफमा १-० को अग्रता लिएको नेपालले दोस्रो हाफमा गोल खान पुग्यो ।
दोस्रो हाफको ६२ औं मिनेटमा भारतले गोल फर्कायो। भारतकी कप्तान समिक्षाले बायाँ विङ्गसबाट आएको फ्रिकिकमा ६ यार्ड बक्सभित्रबाट हेडरमार्फत सहज गोल गरेकी थिइन् । यसपछि दुबै टोलीले पाएका राम्रा अवसर खेर फालेका थिए । निर्धारित समय १-१ को बराबरी भएपछि खेलको निर्णय पेनाल्टीबाट गराइएको थियो। पेनाल्टीमा नेपालका लागि अन्जना रानामगरले दुई प्रहार बचाइन् भने भारतको एक प्रहार क्रसबारमा लागेको थियो ।
नेपाली पूजा रानाको प्रहार बाहिरिएको थियो। नेपालका लागि गोलरक्षक अन्जना, रेखा पौडेल र मनिषा राउतले गोल गरेका थिए । नेपाल समूह ‘बी’ को उपविजेताको रुपमा सेमिफाइनल पुगेको थियो। भारतले समूह चरणमा दुवै खेल जित्दै समूह ‘ए’ को विजेता भएको थियो। नेपालले समूह चरणको खेलमा पाकिस्तानलाई १२-० ले पराजित गर्दा बंगलादेशसँग भने २-१ ले पराजित भएको थियो ।
श्राेतः Janasawal.com
२०८१ मंसिर २५ - मंगलवार
