नेपालमा पछिल्लो समय कलाकारहरुको पारिश्रमिक बढिरहेको अवस्था छ । फिल्ममा एउटा नायकले १ लाख देखी ४० लाख सम्म लिएको समाचारहरु बाहिरिएका छन् । औसतमा २० लाख भन्दा बढि पारिश्रमिक लिने नायकमा अनमोल केसी र प्रदिप खड्का रहेका छन् भने नायकलाई पछ्याउँदै नायिकाहरु प्नि महँगिन थालेकी छिन् ।
हालै नायिका साम्राज्ञी राज्य लक्ष्मी शाह नयाँ फिल्मको लागि १५ लाख पारिश्रमिक सहित अनुबन्धित भएकी छिन् भने नायिका पुजा शर्माले पनि साम्राज्ञीलाई पछ्याउँदै फिल्म सम्हालिन्छ कहिले मनमा १५ लाख पारिश्रमिक लिएकी छिन् । साम्राज्ञीले फिल्म ड्रिम्सदेखी सबै फिल्म सफल बनाएकी छिन् । उनको अभिनय रहेको फिल्म तिमीसँग औसत फिल्म हो । यस्तै नायिका पुजा शर्माले शुरुमा औसत फिल्म अझैपनि र मधुमास गरेकी थिईन् भने प्रेम गीत देखी रामकहानी सम्म सफल फिल्म दिएकी छिन् ।
नेपाली फिल्म क्षेत्रमा कुनै एक समय नायकको भन्दा पाँच गुणा कम पारिश्रमिक नायिकालाई दिने परम्परा नै थियो । तर अहिले नायककै जति पारिश्रमिक नायिकाहरुले लिन थालेकी छिन् । आफ्नो प्रतिभा प्रस्तुत गरेर महँगो पारश्रमिक लिनु कलाकार र प्राविधिकको अधिकार पनि हो । तर त्यहि अनुसारको फिल्म र फिल्म बजार छ कि छैन भन्ने दोश्रो पक्षलाई पनि ख्याल गर्नु पर्ने हुन्छ ।
अन्यथा कलाकार र प्राविधिकको पारिश्रमिक बढ्ने फिल्म बजार लगातार घट्ने अवस्थाको सिर्जना हुनसक्छ । जे होस् पछिल्लो समय साम्राज्ञी र पुजाले नायक बराबरकै पारिश्रमिक लिएर सबैलाई चकित बनाएकी छिन् ।
फिल्मी फण्डाबाट
