काठमाण्डौं । मंसिर २९ । नुवाकोटमा शुक्रबार भएको आईचर दुर्घटनामा मृत्यु हुनेको संख्या २० पुगेको छ । दुर्घटनामा १७ पुरुष र ३ महिला गरी २० जनाको मृत्यु भएको छ । १८ जनाको हिजो र २ जनाको उपचारको क्रममा निधन भएको हो । मृत्यु भएका २० मध्य ५ जनाको मात्र सनाखत भएको प्रहरीले बताएको छ । सनाखत भएकाहरुमा शिखरबेँसीका १६ वर्षीय रितेश पण्डित, घ्याङफेदी सिसिपुका ३५ वर्षीय रिवल तामाङ, ४० वर्षीय आइत तामाङ, सिसीपुका शुक्रमान तामाङ र सेनाम लामा रहेका छन् ।

शुक्रबार साँझ दुर्घटना भएका कारण उद्धार कार्यमा समस्या भएको थियो । दुर्घटना लगतै जिल्ला प्रहरी कार्यालय नुवाकोटबाट पुगेको प्रहरी टोलीले राती अबेर सम्म टर्चबालेर उद्धार गरेको थियो । दुर्घटना स्थल खोंचमा रहेको कारण मृत्यु हुने अन्यको शव पनि भेटीन सक्ने बताइएको छ ।

नुवाकोटको दुप्चेश्वर गाँउपालीकामा शिखरबेसीबाट घयाङफेदी तर्फ जाँदै गरेको बा३ख ३९१३ नम्बरको आईचर शुक्रबार साँझ दुर्घटना भएको हो । शिखरबेसीस्थित घ्यावामा गएर फर्किएका ३७ भन्दा बढी यात्री रहेको आईचर घ्याङडाँडाको भीरबाट करिब ४०० मिटर तल खसेको स्थानीय लालबहादुर तामाङले जानकारी दिएका छन् ।