चोलेन्द्रलाई प्रधानन्यायाधीश बनाइए देश नै खतरामा पर्ने : जफर
काठमाडौं, १३ पुस । न्यायाधीश चोलेन्द्र शमशेर ज.ब.रा.ले ऐतिहासिक धरोहर तथा सार्वजनिक सम्पदा मासेको आरोप लागेको छ ।
न्यायाधीश चोलेन्द्रलाई न्याय परिषद्ले प्रधानन्यायाधीशका लागि सिफारिस गरेपछि उनका विरुद्ध प्रमाणसहित यस्तो गम्भीर आरोप लागेको हो ।
ऐतिहासिक धरोहर तथा सार्वजनिक सम्पदा संरक्षण अभियान वीरगन्जले शुक्रबार मधेश मिडिया हाउसमा पत्रकार सम्मेलन गरी जफर अन्सारीले न्यायाधीश जबरामाथि यस्तो आरोप लगाएका हुन् । उनले पत्रकार सम्मेलनमा भने, ‘यस्ता भ्रष्ट व्यक्ति न्याय क्षेत्रको सर्वोच्च पदमा पुगे देश नै खतरामा पर्नेछ ।’
अभियानका संयोजक अन्सारीले ’जबराको नातामा पर्ने प्रमोद विक्रम शाहले किर्ते प्राण गरी जिल्ला बारामा मेरो लगत श्रेस्ता कायम रहेको जिल्ला परिवर्तन भएका बखत मेरो जग्गा पर्सामा पर्न गएको भनी झुठा प्रपञ्च खडा गरी मिति २०४८ साल बैशाख २० गते १ नं. नयाँ नापी गोश्वारा टोलीमा दर्ता गराउन सफल भएको’ विज्ञप्तिमा उल्लेख गरेका छन् ।
ऐतिहासिक तथा धार्मिक सार्वजनिक पोखरीको एक भागमा हिन्दू समुदायको छठघाट, मुस्लिम समुदायको ईदगाह, सरकारी ताराचन किसनलाल स्कूल तथा अनाथालय भूमाफिया प्रमोद विक्रम शाहले आफ्नो नाममा दर्ता गराएको आरोप अन्सारीको छ ।
तत्कालीन अवस्थामा न्यायाधीश चोलेन्द्रको इजलाशबाट नातावादको आडमा आपसी मिलेमतो गरी न्यायको सर्वमान्य सिद्धान्त विपरीत शाहको नाउँमा लालपुर्जा कायम गरिदिएको अन्सारीले पत्रकार सम्मेलनमा भने ।
‘उक्त पोखरीमा आजसम्म हिन्दू मुस्लिम समुदायको धर्म संस्कृतिका कार्यहरु परम्परागत रुपमा हुँदै आएकोमा भूमाफिया प्रमोद विक्रम शाह सर्वोच्च अदालतको फैसलाको आधारमा सार्वजनिक पोखरीको धार्मिक प्रकृति लोप गर्नका लागि गुण्डा बदमास लगाई छठ देवीका पुराना अवशेषहरु लोप गरी माटो पुर्न खोज्दा हिन्दू मुस्लिम समुदायबाट पटक–पटक प्रतिकार गर्दा गम्भीर प्रकृतिका घटनाहरु भए’ विज्ञप्तिमा उल्लेख छ ।
२०८२ बैशाख १३ - शनिबार
