काठमाडौं – स्वतन्त्र शैक्षिक परामर्श संघ, नेपाल (फेकन) ले भदौ ६ र ७ गते फुटसल प्रतियोगिता गर्ने भएको छ । फेकनका सहकोषाध्यक्ष तथा टुर्नामेन्टका सह संयोजक अनिल शर्मा पौडेलले कार्यक्रमको तयारी भइसकेको बताए ।
प्रतियोगितामा फेकनसँग आबद्ध कन्सल्टेन्सी र यसमा कार्यरत कर्मचारीहरु सहभागी हुने जनाइएको छ । वालुवाटारमा हुने प्रतियोगीतामा १० देखि १२ वटा समूहको सहभागिता हुने आयोजकले जनाएको छ ।
फेकन अध्यक्ष युवराज कटुवालले व्यवसायीहरुबीच आपसी समझदारी कायम गर्ने र एक आपसमा सहकार्य र सहयोग गरेर जाने उद्देश्यले प्रतियोगिता गर्न लागिएको बताए । अध्यक्ष कटुवालले सबै व्यवसायीहरुबीचको एकता अहिलेको आवश्यकता भएकाले आफूहरुबीच देखिएको मनमुटाव र असझदारी पनि यो कार्यक्रमबाट अन्त्य हुने दाबी गरे ।
प्रतियोगितामा प्रथम हुनेलाई ५० हजार रुपैयाँ मेडल र ट्रफि, द्वितीय हुनेलाई ३० हजार रुपैयाँ मेडल र ट्रफि, तृतीय हुनेलाई २० हजार रुपैयाँ मेडल र ट्रफि पुरस्कार दिइनेछ । त्यसैगरी बेष्ट प्लेयर र हाई स्कोररलाई पनि पाँच हजार रुपैयाँ र ट्रफि प्रदान गरिनेछ । फेकन फुटसल टुर्नामेन्ट–२०१९ नाम दिईएको यो प्रतियोगीतामा सहभागीका लागि आयोजकले सम्बन्धित सबैलाई आग्रह गरिसकेको छ ।
जापान विभाग प्रमुख समेत रहेका फेकनका सहकोषाध्यक्ष तथा टुर्नामेन्टका सह संयोजक अनिल शर्मा पौडेलले टुर्नामेन्टले यो व्यवसायमा एउटा सकारात्मक सन्देश छोड्ने दाबी गरेका छन् ।
कार्यसमिति सदस्य समेत रहेका कार्यक्रमका संयोजक तथा अन्तर्राष्ट्रिय विभागका प्रमुख उमेश कुशवारले आगामी दिनमा पनि व्यवसायीका पक्षमा यस्तैखाले कार्यक्रम गर्दै जाने बताए । उनले फेकन सामाजिक संस्था पनि भएको र समाजमा आइपरेका हरेक दुःखमा सहभागी भएर राहत र उद्धारको काममा लागि परेको बताए । टुर्नामेन्टमा कार्यसमिति सदस्य हेमन्तराज दुलाल र बालकृष्ण विष्ट पनि सदस्य रहेका छन् । आयोजकले प्रतियोगितका लागि ६ देखि साढे ६ लाख रुपैयाँसम्म खर्च हुने अनुमान गरेको छ ।
विद्यार्थी जापान पठाउने कन्सल्टेन्सीहरुले यसअघि नै आफ्नो टिम घोषणा गरेका छन् । हेमन्तराज दुलाल टिम म्यानेजर, विश्व पराजुली कोच, अनिल शर्मा पौड्याल क्याप्टेन र अर्जुन बस्नेत सह क्याप्टेन रहेका छन् । यो टीमबाट डीडास योकोसो, असाही, स्काई लाइन, स्पेसल, मिन्ना नो वकाबा, वल्र्ड ब्रिज, माउन्टेन फुजी र डाइमण्डले खेल्ने छन् । यो समूहलाई सार्थक इन्भेष्टमेन्ट कम्पनी प्रालिका निर्देशक कोषराज गिरीले प्रायोजन गरेका छन् ।
