काठमाडौं, २९ असोज । गैरआवासीय नेपाली संघ (एनआरएनए)को नयाँ नेतृत्वका लागि निर्वाचन कार्यक्रमअनुरुप मतदान हुँदानहुँदै स्थगित भएको छ । निर्वाचन कार्यतालिकाअनुसार बुधबार निर्धारित समय भन्दा ३ घण्टा ढिलो गरी ८ बजेपछि बल्ल सुरु गरिएको मतदान भोटिंङ मेशिन ब्रिग्रिएको भन्दै स्थगित गर्ने घोषण गरियो ।
इलोक्टोनिक मतदान सुरु हुँदानहुँदै प्राविधीक समस्या आएको भन्दै आज विहान १० बजेसम्मका लागि स्थागित गरिएको निर्वाचन आयुक्त शिव रिजालले जानकारी दिए । मतदान स्थगित हुनुअगावै निर्वाचन कार्यतालिकाअनुसार मतदान समयमा सुरु नभएको र भित्रभित्रै चलखेल भइरहेको भन्दै मतदानका लागि लामो लाइनमा बसिरहेका प्रतिनिधिहरुले नाराबाजी र तोडफोडमा उत्रिएका थिए ।
आक्रोशित भीडले मतदान स्थाल बाहिरको केही टेबल कुर्सी फुटाए भने सुचना बोर्ड फालेका थिए ।
निर्वाचनमा ७६ ले उम्मेदवारी दर्ता गराएका छन् । एनआरएनएका प्रमुख निर्वाचन आयुक्त शिव रिजालले ४२ पदका लागि ७६ ले उम्मेदवारी दर्ता भएको जानकारी दिए । मंगलबार साँझदेखि आज अपराह्न ३ः०० बजेसम्म उम्मेदवारी दर्ताको समय तोकिएको थियो । नयाँ नेतृत्वमा अध्यक्षमा कुमार पन्त र कूल आचार्यले उम्मेदवारी दर्ता गराएका छन् । यसैगरी महासचिवमा डा हेमराज शर्मा र जानकी गुरुङले उम्मेदवारी दर्ता गराएका छन् ।
विद्युतीय मेसिनबाट हुने निर्वाचनमा मतदान भएको एक घण्टामा नै मतपरिणाम सार्वजनिक गर्ने प्रमुख निर्वाचन अधिकृत रिजालले बताए । निर्वाचनमा करीब दुई हजार ४०० मतदाता सहभागी हुनेछन् ।
मतदानको लाइनमा बसिरहेका प्रतिनिधिहरुमध्येबाट केही समुहले आफुहरुलाई गोटी बनाईएको र चलखेल गरेर नियतबस मतदान स्थगित गरिएको भन्दै मतदान बहिष्कार गर्ने चेतावनी दिएका छन् ।
२०८१ आश्विन २२ - मंगलवार
