काठमाडौँ । जारी १३औँ दक्षिण एशियाली खेलकुद (साग) अन्तर्गत पुरुष फुटबलमा नेपाल श्रीलंकासंग बराबरीमा रोकिएको छ । दशरथ रंगशालामा सम्पन्न खेलमा नेपाल र श्रीलंकाबीचको खेल १-१ गोलको बराबरीमा रोकिएको हो ।
नेपालका लागि खेलको पहिलो हाफको ३६औ मिनेटमा पेनाल्टी मार्फत सुजल श्रेष्ठले गोल गरेका थिए भने श्रीलंकाले खेलको ९१औ मिनेटमा मोहमद आकिबले फ्रि-किकबाट सुन्दर गोल गर्दै खेल बराबरी गरेको थियो । मंगलबार भुटानविरुद्ध २ गोल गरेका नेपाली कप्तान सुजलले जारी सागमा आफ्नो गोल संख्या ३ पुर्याएका छन् । अन्तिम मिनेटमा गोल गर्दै श्रीलंकाले नेपालसँग खेल बराबरी गरेर अंक खोस्न सफल भएको छ ।
योसँगै नेपालले २ खेलमा एक जित र एक बराबरी खेलेको छ भने श्रीलंकाले खेलेका दुवै खेलमा बराबरी खेलेको छ । आजको खेलपछि नेपालले अब आगामी शनिबार माल्दिभ्स तथा आइतबार बंगलादेशसँग खेल्ने तालिका रहेको छ । यस पटकको सागमा भारत र पाकिस्तानले फुटबलमा सहभागिता जनाएका छैनन् ।