विश्वमा महामारीका रूपमा फैलिरहेको कोरोना भाइरस (कोभिड–१९) रोकथामका लागि सरकारले देशव्यापी लकडाउन लागू गरेको विशेष परिस्थितिलाई ध्यानमा राखी नगरवासीको सुविधाका लागि काठमाडौं महानगरपालिकाले आजैदेखी निःशुल्क एम्बुलेन्स सेवा सञ्चालनमा ल्याएको छ ।
कोरोना भाइरस संक्रमित बाहेक अन्य स्वास्थ्य समस्या भएका नगरवासीलाई घरबाट अस्पताल, अस्पतालबाट घर तथा एउटा अस्पतालबाट अर्को अस्पताल लान(ल्याउन यो सेवा संचालन ल्याउने निर्णय कामपाले गरेको हो । यसको लागी काठमाडौं महानगरपालिकाले संयुक्त एम्बुलेन्स चालक संघ, नेपालको काठमाडौं जिल्ला कार्यसमितिसँग सहकार्य गर्ने गरी सम्झौता गरिसकेको छ । यो सेवा अन्तर्गत महानगरवासीले पुर्णतस् निशुल्क सेवा पाउने छन् । यो निःशुल्क सेवा महानगरको भौगौलिक सीमाभन्दा २ कि.मि. टाढासम्मको लागी हो । काठमाडौं महानगरको सीमाबाट दुई किमिभन्दा बढी दुरी जानुपरेमा बिरामीले आवश्यक शुल्क तिर्नु पर्ने प्रावधान राखिएको छ ।
यसका लागि ५ वटा एम्बुलेन्स २४ सै घन्टा उपलब्ध हुने र सेवा दिए वापत एम्बुलेन्स सेवाले सेवाग्राहीसँग कुनै प्रकारको थप शुल्क लिने वा नाइँनास्ती र मोलमोलाई गर्न नपाइने व्यहोरा सम्झौतामा उल्लेख छ । यसको लागि सेवाग्राहीले कामपाको टोल फ्रि नं. ११८० मा सम्पर्क गरी यो सेवा लिन सकिनेछ ।
कोरोना भाइरसबाट संक्रमित विरामीका लागि महानगरपालिकाको सहकार्यमा सञ्चालित नेपाल एम्बुलेन्स सेवा–१०२ पहिल्यैदेखि सेवारत छ । १०२ का एम्बुलेन्सहरू हाल कोरोना भाइरस विरामीका लागि छुट्याइएकोले अन्य विरामीका लागि काठमाडौं महानगरपालिकाले यो थप सुविधा व्यवस्था गरेको हो । कामपाले संचालनमा ल्याएको यो नयाँ सेवाबाट हृदय रोगी, नियमित डायलसिस गर्नु पर्ने मधेमेहका बिरामी लगायतका अन्य बिरामी लाभान्वित हुने बिस्वास महानगरपालिकाले लिएको छ ।
काठमाडौं महानगरपालिकाका प्रमुख विद्यासुन्दर शाक्यले हाल लकडाउनका कारण काठमाडौं महानगरपालिका क्षेत्रमा विरामीलाई अस्पताल लान र अस्पतालबाट घर फर्काउन यातायातको ठूलो समस्या देखिएकोले त्यसैलाई ध्यानमा राखी यो थप एम्बुलेन्स सेवा व्यवस्था गरेको बताउनुभएको छ । हाल निश्चित अवधिका लागि यो सेवा व्यवस्था गरेको भए पनि भविष्यमा आवश्यक परे यसलाई अझ बढाउन सकिने पनि उहाँले बताउनुभएको छ । यसमा सबै खाले विरामीले सेवा पाउने भए पनि हृदयाघात, मृगौला र अन्य आकस्मिक सेवा आवश्यक पर्ने विरामीलाई पहिलो प्राथमिकतामा राखेर सेवा प्रदान गर्ने पनि उहाँले बताउनुुभयो ।
२०८१ भाद्र २६ - बुधबार
