• मातातीर्थ औंसीको अवसरमा शिव अधिकारीले घोषणा गरे १,०१,१११ रुपैयाँको आमा कल्याणकारी कोष तथा पत्रकारिता पुरस्कार

    न्यूजलाईन्स् मिडिया संवाददाता
    प्रकाशित मिति : ११ बैशाख २०७७, बिहीबार १०:०६

    मातातीर्थ औंसीको अवसरमा गन्तव्य नेपाल ग्रुपका अध्यक्ष तथा समाजसेवी शिव अधिकारी ‘अविरल’ले स्वर्गीय आमा गौरादेवी अधिकारीको नाममा १ लाख १ हजार १ सय ११ रुपैयाँको आमा कल्याणकारी कोष तथा पत्रकारिता पुरस्कार घोषणा गरेका छन् । आज सामाजिक सञ्जाल फेसबुक मार्फत एक वक्तव्य जारी गर्दै समाजसेवी अधिकारीले ६० हजार १ सय ११ रुपैयाँको ‘गौरादेवी आमा कल्याणकारी कोष’ र ४० हजार रुपैयाँको ‘गौरादेवी पत्रकारिता पुरस्कार कोष’ स्थापना गरेको घोषणा गरेका हुन् ।
    “स्वर्गीय आमा गौरादेवी अधिकारीको सम्झना र समस्त नेपाली आमाहरूको सम्मानमा ६० हजार १ सय ११ रुपैयाँको ‘गौरादेवी आमा कल्याणकारी कोष’ स्थापनाको घोषणा गर्दछु,” वक्तव्यमा अधिकारीले भनेका छन्, “यसै अवसरमा ४० हजार रुपैयाँको ‘गौरादेवी पत्रकारिता पुरस्कार कोष’ स्थापना गरी नुवाकोट जिल्लाका २ जना र राष्ट्रिय स्तरका २ जना गरी ४ जना पत्रकारलाई जनही १० हजार रुपैयाँ राशिका ‘गौरादेवी पत्रकारिता पुरस्कार’ प्रदान गर्ने घोषणा गर्दछु ।”
    अधिकारीका अनुसार, यो पुरस्कार आगामी दुई महिनाभित्र हुने गन्तव्य नेपालको वार्षिक अवसरमा प्रदान गरिनेछ । आमा कल्याणकारी कोषको रकम भने दीन-दु:खी, असहाय आमाहरुको आकस्मिक उपचारका लागि सहयोग स्वरुप प्रदान गरिने वक्तव्यमा उल्लेख छ ।
    पत्रकारिता र पर्यटन उद्यममा दुई दशक बिताएका अधिकारी एक दशकदेखि समाजसेवामा लागिपरेको छन् । जन्मथलो नुवाकोटको तारुकाबाट समाजसेवा सुरु गरेका अधिकारी तारुकाबाट तारकेश्वर, त्यहाँबाट सिङ्गो नुवाकोट हुँदै राष्ट्रिय स्तरमै एक गतिशील सामाजिक व्यक्तित्वका रूपमा चिनिन थालेका छन् ।
    तारकेश्वरभित्र २०७२ को महाभूकम्पपछिको पुनर्निर्माणमा उल्लेख्य योगदान गरेका अधिकारी त्यसयता गाउँको स्वास्थ्य, शिक्षा, खानेपानी, महिला सशक्तीकरण, युवा तथा खेलकुद लगायत क्षेत्रको विकासमा समर्पित छन् ।
    अहिलेको कोरोना महामारीका बीच उनले कोरोना प्रतिरोधी अभियान चलाइरहेका छन् । जसअन्तर्गत, तारकेश्वर गाउँपालिकाभरि घर-घरमा सचेतना तथा मास्क वितरण कार्यक्रम चलिरहेको छ । हालसम्म गाउँपालिकाका ६ वटै वडामा गरी १६ हजार थान मास्क वितरण भइसकेको छ भने यसलाई जारी राख्दै छिमेकी गाउँपालिकाहरूमा पनि मास्क वितरण अभियान विस्तार गर्ने उनको योजना छ ।
    लकडाउन अघि अधिकारीले अस्थायी रूपमा काठमाडौं बस्दै आएका घर फर्कन चाहने नुवाकोटेहरूका लागि नि:शुल्क बस को व्यवस्था गरेका थिए । उनको संयोजनमा लकडाउन अघिका दुई दिनमा एक दर्जन बस काठमाडौंबाट त्रिशूली पठाइएको थियो ।
    यसैबीच, उनले नुवाकोट जिल्लाको उत्तरी भेगमा पर्ने किस्पाङ गाउँपालिकामा सेवामा खटिने स्वास्थ्यकर्मीको सुरक्षाका लागि १० थान पिपिई तथा एप्रोन सेट समेत उपलब्ध गराएका छन् ।

    फेसबुक प्रतिक्रिया
    सम्बन्धित शीर्षकहरु