गोमादेवी मेघनाथ स्मृति संस्थाद्वारा भमराको नेवार समुदायमा ‘एक घर एक बोरा’ चामल वितरण

न्यूजलाईन्स् मिडिया संवाददाता
प्रकाशित मिति : २०७७ बैशाख १३ गते, शनिबार २१:५२

एक महिना लामो लकडाउनका कारण समस्यामा परेका परिवारलाई राहत पुर्याउने उद्देश्यले नुवाकोटको तारकेश्वर-६, भमरास्थित गोमादेवी मेघनाथ अर्याल स्मृति संस्थाले स्थानीय नेवार समुदायमा चामल वितरण गरेको छ । अधिकांश परिवार ज्याला-मजदुरीमा आश्रित रहेको सो समुदायमा संस्थाले प्रति-परिवार एक बोरा (२५ केजी) का दरले चामल वितरण गरेको हो ।
लकडाउनले गर्दा सामान्य मजदुरी गर्ने उक्त समुदायलाई जीविकोपार्जनमा परेको समस्यामा केही हदसम्म भए पनि मलमपट्टी लगाउने उद्देश्यले चामल वितरण गरिएको संस्थाका अध्यक्ष ईश्वर अर्यालले बताएका छन् । उनका अनुसार, आज संस्थाका संरक्षकद्वय रामप्रसाद अर्याल र कृष्णप्रसाद अर्यालले संयुक्त रुपमा चामल वितरण गरेका हुन् ।
सामाजिक कार्यमा अनवरत सक्रिय यस संस्थाले कोरोना प्रकोप सुरु भएदेखि नै राहत तथा सचेतना अभियान चलाइरहेको छ । यसअघि संस्थाले गाउँपालिकाका विभिन्न स्थानमा ड्रम राखेर साबुन पानीले हातधुने व्यवस्था मिलाएको थियो ।
स्वर्गीय आमा गोमादेवी अर्यालको पुण्यतिथिको अवसरबाट सुरु गरिएको अभियानलाई अझ विस्तार गर्दै लैजाने अध्यक्ष ईश्वर अर्यालको योजना छ । पछिल्लो समय आफूलाई समाजसेवामा समर्पित गरेका अर्यालले आगामी दिनमा सामाजिक कार्यमा अझै बढी क्रियाशील भएर दीन-दुःखीको सेवामा लागिपर्ने प्रतिबद्धता जनाएका छन् ।
संस्थाका सल्लाहकार केशव अर्यालले कोरोना महामारीका कारण समस्यामा परेका परिवारजनलाई सहयोग गर्न पाउँदा खुसी लागेको भन्दै राहत तथा सचेतना अभियानलाई निरन्तरता दिने बताएका छन् ।

फेसबुक प्रतिक्रिया
सम्बन्धित शीर्षकहरु