काठमाडौँ -सरकारको नीति तथा कार्यक्रम समस्या समाधानमुखी नभएको आरोप प्रमुख प्रतिपक्षी नेपाली काँग्रेसले लगाएको छ । काँग्रेस सभापति एवं संसद्मा विपक्षी दलका नेता शेरबहादुर देउवाले प्रतिनिधिसभामा नीति तथा कार्यक्रमबारे धारणा राख्दै कोरोना संक्रमणबाट आहत हुनेलाई राहतको व्यवस्था नगरेको तथा जनताले सरकार भएको अनुभूति नगरेको बताएका हुन् ।
महामारीको बहुआयामिक प्रभावबारे नीति तथा कार्यक्रम मौन रहेको आरोप लगाए । उनले सीमा अतिक्रमणबारे नीति तथा कार्यक्रम अपूर्ण रहेको बताए । उनले यो विषयमा चीनसँगसमेत वार्ता गर्नुपर्ने उल्लेख गरे । उनले सरकारको नीति तथा कार्यक्रममा काँग्रेसले संशोधन प्रस्ताव ल्याउने जानकारी पनि दिए ।
देउवाको सम्बोधनको मुख्य अंश :
- सरकारलाई जनताको दुःखप्रति कुनै संवेदना छैन
- एक वर्षीय नीति तथा कार्यक्रममा दश वर्षको योजना जस्तो
- नीति तथा कार्यक्रमले जनतामा आशा जगाउन पूर्ण विफल
- चार महिनामा मात्र २६ हजारको परीक्षण हुनु दुखद
- अझै आवश्यक सामग्री उपलब्ध नहुनु र राहतको व्यवस्था नहुनु सरकार भएको अनुभूति भएन
- विदेश र नाकामा अलपत्र नागरिकलाई उद्धार हुन सकेन
- सरकारका अघिल्ला दुई नीति तथा कार्यक्रम हेर्दा लाजमर्दो परिस्थिति हुन्छ
- दुई वर्षअघिकै योजना र कार्यक्रम पुनरावृत्ति गरिएबाट कार्यान्वयन फितलो
- औषधि खरिदमा मन्त्री नै संलग्न भएको घटनामा सरकारको भ्रष्टाचारविरुद्धको प्रतिबद्धता काम छैन
- निर्मला पन्तका हत्यारा अझै पत्ता नलाग्दा न्यायप्रति आशा गर्न सकिएन ।
- समस्या समाधानतर्फ नीति तथा कार्यक्रम उन्मुख छैन ।
- सङ्घीयता कार्यान्वयनमा सरकार उदासीन ।
- प्रेस स्वतन्त्रतालाई कुण्ठित गर्ने प्रयास भइरहेको छ ।
- नेपाली भूमिबारे नीति तथा कार्यक्रम अपूर्ण छ ।
- अतिक्रमणबारे चीनसँग समेत वार्ता गर्नुपर्छ |
सम्बन्धित शीर्षकहरु
२०८० आश्विन १७ - बुधबार
