आन्दोलन र प्राप्ति
छन्द- उपजाति
धोक्रा भरौटे छल मात्र गर्ने
झोला भरौटे गुणगान गर्ने
सदैव चम्चा हजुरी बजार्ने
भएन कोही जननी सिंगार्ने।।
छोडेर झुप्रो पछुवा भएका
हाँसेर अग्लो घरमा गएका
जुठोपुरोमा अभिमान गर्ने
भएन कोही जननी सिंगार्ने।
धोक्रेहरूको हनुमान बन्दै
बोकेर हिड्दै भगवान भन्दै
ठुटा सडेका नवरत्न ठान्ने
भएन कोही जननी सिंगार्ने।
कैयौं अघोरी पनि ढाट्न आए
घस्दै खरानी गफ बाड्न आए
पहाड कब्जे दरबार अग्लो
रहेन प्यारो जननी त सग्लो।
ढ्याँङ्ग्रो ठटाए नव क्रान्ति भन्दै
स्याँन्द्रे हराए वलवान ज्यूँदै
बिलाउनेको न त नाम आयो
हरामलाई पद काम आयो।।
गर्नेछ आन्दोलन जो रमाई
सोचेर मोटो धनको कमाई
कुबेर बन्ने जब मिल्छ मौका
लगेर धर्ती तब खेल्छ चौका।।
क्रमश……
शम्भु गजुरेल
नुवाकोट
२०८० आश्विन १२ - शुक्रबार
