• कोरोनाको कहर, दशैं परम्पराको निरन्तरता

    न्यूजलाईन्स् मिडिया संवाददाता
    प्रकाशित मिति : ४ कार्तिक २०७७, मंगलवार ०९:१५

    विगत लामो समयदेखि विश्वभर फैलिएको कोरोना भाईरस (कोभिड –१९) को कारण संसारभर मनोवैज्ञानिक त्रास फैलिएको छ । यसको कारण विश्वले ठूलो मात्रामा मानविय तथा आर्थिक क्षति वेहोर्न बाध्य भएको छ भने नेपालको अर्थतन्त्रमा पनि ठूलो धक्का पु¥याएको छ । आजसम्म यस रोगको कुनैपनि उपचार पद्धति पत्ता नलागेकाले यसबाट अझैपनि हुने क्षति कसैलेपनि पूर्वानुमान गर्न नसक्ने अवस्था छ ।
    नेपालमा यस रोगबाट हुने खतरालाई मध्य नजरगरि सरकारले लकडाउन, निषेधाज्ञा हुँदैं स्वास्थ्य सम्बन्धी विभिन्न मापदण्ड बनाएर केहिहदसम्म यसको नियन्त्रण तथा जनजिवनलाई सहज बनाउन प्रयास गरिरहेको छ । सरकारले गरेको लकडाउन, निषेधाज्ञा लगायतका क्रियाकलापले आर्थिक गतिविधि ठप्प भइ जनजीवन भने थप कष्टकर बन्दै गएको छ । यतिवेला आम सर्वसाधारणले दैनिक जीवनयापन र साँझ–बिहानको हातमुख जोड्ने उपायको खोजीमा कसरी जुट्ने भन्ने समस्या देखापरेको छ ।
    त्यसो त नेपालीहरुको महान चाड बडा दशैं, तिहार, छठ लगायतका पर्वहरु एकपछि अर्को गर्दै सुरु हुँदैछन् । असोज महिनामा अधिक मास परेकोले यो वर्ष दशैं कात्र्तिक १ गतेबाट मात्र सुरु हुँदैं छ । दशैं नेपालीहरुको आपसी जमघट गरेर मनाउने एक महान पर्व हो । घरबाट टाढा रहेका विभिन्न रोजगारी, शिक्षा, व्यपार तथा व्यवसाय गरेर बसेकाहरु यातायातको साधनहरु चल्न सुरु भएसंगै गाउँ फर्किने लहर समेत चलेको छ । यसरी मानिसहरु गाउँ फर्किदा कोरोना संक्रमणको जोखिम भने अझ बढेर जाने प्रस्ट छ ।
    सरकारले तोकेको स्वास्थ्य सम्बन्धी मापदण्ड, सामाजिक दुरी, अनिवार्य माक्स तथा बेलाबेला हातमा सेनिटाईजर र सम्भव भएसम्म बेलाबेला सावुन पानीले हात धुने कार्य अव कुनै नौलो विषय रहेन । तर काठमाण्डौं उपत्यका लगायतका क्षेत्रहरुमा बढ्दै गएको उच्च जोखिमलाई हेर्ने हो भने यो मापदण्डले खासै काम गर्न नसकेको प्रस्ट देखिन्छ । यसमा नागरिकहरुको आफैप्रतिको सावधानी पनि उतिकै जरुरी हुन्छ । दशैं मनाउने र आफन्तसंग भेटेर खुसी साट्ने सपना बोकेकाहरुले आफु सजग रहनुपनि उतिकै आवश्यक छ । आफुले तोकेको मापदण्ड पुरा नगरेको खण्डमा आफुमात्र नभएर पुरै परिवार र समाजलाई समेत असर गर्छ, हानी पु¥याउँछ भन्ने कुरामा सबैको ज्ञान जरुरी छ ।
    पहिले झैं दशैलाई भेटघाट, टिकाटाला तथा रमाईलो गरेर मनाउनुको साटो परम्परालाई धान्ने र संस्कृतिको जर्गेना गर्ने हिसावले मात्र मनाउने हो भने केहि हदसम्म सावधानी हुन सक्ने कुरामा दुईमत छैन । दशैंमा हुने पारिवारिक भेटघाटको बेलामा समेत भौतिक दुरी (सामाजिक दुरी), माक्स, सेनिटाईजर र स्वास्थ्य सम्बन्धी अन्य मापदण्डको सबैले पालना गरौं । र थला परेको अर्थतन्त्र र कष्टकर बन्दै गएको सामाजिक जनजीवनलाई विस्तारै माथी उकास्न सबैले हातेमालो गरौं
    अन्तमा, यस वर्षको दशैं परम्पराको निरन्तरता र संस्कृतिको जर्गेना हुने हिसावले मनाऔं । आफु असुरक्षीत क्षेत्रमा रहनु भएकाहरुले घरजान बल नगरौं र घरमा हुनेले पनि यो वर्ष आएन भनेर मन खल्लो नपारौं । हामी स्वस्थ रहे पो जीवन रहन्छ । हामी रहे पो परिवार र चाडपर्व पनि रहन्छन् । त्यसैले कोरोनासंग जुध्दै आफुपनि स्वस्थ रहुँ, अरुलाई पनि स्वस्थ रहन सहयोग गरौ ।
    आफुपनि बाँचाै र अरुलाई पनि बचाऔं ।

    फेसबुक प्रतिक्रिया
    सम्बन्धित शीर्षकहरु