• मेरो प्यारो टुकि’

    न्यूजलाईन्स् मिडिया संवाददाता
    प्रकाशित मिति : ६ मंसिर २०७७, शनिबार १८:४०

    मट्टीतेलको आडमा
    धिपधिप बल्थ्यो
    नाकबरी कालो मुस्लो पस्थ्यो
    कहिले कापी किताब,
    कहिले ओछ्यान पोल्थ्यो !

    आफू मधुर भएर पनि
    चहकिला देखिन्थे हरफहरु !
    गहकिला भेटिन्थे लाईनहरु !!
    सुन्दर लाग्थ्यो कथा अनि
    सुनौला लाग्थे निबन्धहरु !!

    याद अझै ताजै छ

    भुगोलको नक्सा छाप्न काम आउँथ्यो मट्टीतेल
    चप्पलको फित्ता जोड्न काम आउँथ्यो टुकि !

    याद आउँछ झलझली
    आफू भर-रात जाग्राम रहेर
    सुताउँथ्यो मलाई घरीघरी !!

    खैर ,

    अब त जमाना फेरिएछ
    मेरो प्यारो टुकि संगै
    मेरा बचपनहरु पनि
    इतिहास बनेछन !!
    टुकिका सहाराले कोरिएका प्रेमपत्रहरु सुलि चढेछन !
    ती रंगिन प्रेमिल शब्दहरु सहिद बनेछन !!
    मैले पढेका अक्षर र सिकेका ज्ञानहरुले आत्महत्या गरेछन् !!

    साच्चै हो साथी,

    झुपडीमा तिम्रो रोशनीद्वारा आर्जेका ज्ञानहरु सहिद बनेछन !
    सत्य, निष्ठा र कर्तव्यका पाठहरुले आत्महत्या गरेछन् !!

    राम चन्द्र तिम्सिना
    (आवाज)

    फेसबुक प्रतिक्रिया
    सम्बन्धित शीर्षकहरु