• स्वखलित भयो हाम्रो क्रान्तिकारिता

    न्यूजलाईन्स् मिडिया संवाददाता
    प्रकाशित मिति : ८ मंसिर २०७७, सोमबार ०८:४४

    दनदनाउँदा दावानलहरू
    पिउँदै प्रतिरोध गर्ने हामीहरू
    क्षतविक्षत भयौं मरणासन्न भयौं,
    यन्त्रणाको पल्लो किनारामा पुगेर
    बाँचेका हामीहरू !

    स्वप्नवत् दृश्यहरु आँखाभरी लिएर
    सम्झँदै उत्ताल तरङ्गहरू अतितका !

    अहो त्यो वीभत्स आँधी थामियो

    अहो त्यो भयानक बलिवेदीको अन्त भयो

    यातना शिविरहरूमा थङथिलो भयौँ हामीहरू !

    ताता गोलीहरूले क्षतविक्षत भयौँ हामीहरू !

    मृत्यु एकदमै नजीकबाट गयो
    बोध भयो हामीलाई
    मृत्युका चिसा हत्केलाहरूमा दमनको
    दुखाई कस्तो हुन्छ भनेर !

    वीभत्स निरङ्कुशताले निल्यो प्यारा साथीहरूलाई,
    अनि
    अनयासै अस्ताए अँगालोका न्याना घामहरू !

    निरङ्कुश बहुला हात्तीको बर्बरता सकियो,
    अँध्यारो लामो कालरात्रिको अन्त भयो !!

    तर ,

    हाम्रा घाईते आँखाहरूमा
    तरङ्गित भए मनमोहक सपनाहरू!

    हाम्रा चहराईरहेका छातीहरूमा
    प्रवाहित भए सुन्दर कल्पनाहरू !

    हामीले बिस्तारै शिर उठाएर पूर्वतिर हेर्‌यौँ
    !
    आहा सुन्दर नेपालको परिकल्पना भित्र तैरिदै गरेका पुँजिवादका बहुरुपी नयाँ आयामहरु!

    न्यानो सूर्योदयको आकाङ्क्षामा
    बिर्सियौँ सारा यन्त्रणाहरू !

    चलमलाउन सकेनन् हाम्रा अवयवहरू !

    जकडियो हाम्रा बहुहरु !

    लत्यांग्रीयो हाम्रा चंक्षुहरु !

    अस्पतालका शय्याहरूमा
    चर्काईएका हाम्रा मेरूदण्डहरू !

    भाँचिएर टुक्राटुक्रा बनाईएका हाम्रा हाँडहरू !

    लुलिएर सुक्दै गएका हाम्रा रक्तनलीहरू !

    शीतक्षेत्रको पुष्प लतिकाझैँ बन्दी बने
    असक्तताका हाम्रा व्यूहहरु !!

    अनि अस्तायौं हामी
    बिलायौं हामि
    तुहियो हाम्रा बिद्रोह,
    अनि स्वखलित भयो
    हाम्रो क्रान्तिकारिता पनि !!

    रामचन्द्र तिम्सिना
    (आवाज)

    फेसबुक प्रतिक्रिया
    सम्बन्धित शीर्षकहरु