
४ असार, काठमाण्डौं । अविरल वर्षापछि आएको बाढीका कारण विस्थापित बनेका मेलम्चीका बाढी पीडितलाई सहयोग गर्नका लागि मेलम्ची नगरपालिकाले ५० लाखको अक्षयकोष स्थापना गरेको छ ।
मंगलबार मेलम्ची र इन्द्रावती खोलामा आएको बाढीका कारण विस्थापित भएका मेलाम्ची बजारका स्थानीयवासीलाई सहयोग गर्नका लागि नगरपालिकाले ५० लाखको अक्षयकोष स्थापना गर्दै सहयोग अपिल समेत गरेको छ ।
‘मेलम्ची र इन्द्रावती खोला आसपासका वस्तिहरु विस्थापित भएका छन् । बाढीबाट विस्थापित तथा संकटमा परेका परिवारलाई पुनःस्थापना गर्न र क्षति भएका संरचनाहरु पुनः निर्माणका लागि यस नगरपालिकाले रु ५० लाख जम्मा गरी ‘मेलम्ची बाढीपीडित राहत तथा पुनःस्थापना कोष’ स्थापना गरेको छ ।’ नगरपालिकाद्धारा गरिएको अपिलमा भनिएको छ ।
नगरपालिकाले यस संकटको घडीमा नगरपालिकालाई सहयोग गर्न इच्छुक, व्यक्ति, संघ संस्था, सरकारी एवं गैह्रसरकारी निकायहरुलाई सहयोग गर्न अपिल गर्दै बैंक खाता समेत उपलब्ध गराएको छ ।



