• पछिल्लो २४ घण्टामा देशैभरी ३ हजार ४८१ जना कोरोना संक्रमित थपिए

    न्यूजलाईन्स् मिडिया संवाददाता
    प्रकाशित मिति : २७ श्रावण २०७८, बुधबार १८:५६

    २७ साउन, काठमाडौं । पछिल्लो २४ घण्टामा देशैभरी ३ हजार ४८१ जना कोरोना संक्रमित थपिएका छन् ।

    स्वास्थ्य तथा जनसंख्या मन्त्रालयका अनुसार १० हजार ९०७ पिसीआर र ५ हजार ७४९ एन्टिजेन गरी दुवै विधिबाट गरिएको १६ हजार ६५६ नमुना परीक्षणमा ३ हजार ४८१ जनामा कोरोना भाइरस संक्रमण पुष्टि भएको हो ।
    आज काठमाडौंमा ६६३, ललितपुर १९२, भक्तपुर १०९ गरी उपत्यकामा ९६४ जना नयाँ संक्रमित थपिएका छन् ।

    मंगलवारको तुलनामा बुधवार संक्रमित हुनेको संख्या केही घटेको हो ।

    त्यसैगरी पछिल्लो २४ घण्टामा १८८५ जना कोरोना संक्रमणबाट मुक्त भएका छन् । योसँगै नेपालमा कोरोना संक्रमणबाट निको हुनेको संख्या ६ लाख ७५ हजार ८३ पुगेको छ ।

    त्यस्तै आज देशैभरी थप ३० जना कोरोना संक्रमितको मृत्यु भएको छ । आज थपिएका ३० जनासँगै नेपालमा कोरोना संक्रमणबाट मृत्यु हुनेको संख्या १० हजार १८० पुगेको छ ।

    हाल देशैभरी सक्रिय संक्रमितको संख्या ३८ हजार ३३ रहेको स्वास्थ्य मन्त्रालयले जनाएको छ । ती मध्ये ३४ हजार ८१३ जना होम आइसोलेशनमा र ३ हजार २२० जना संस्थागत आइसोलेशनमा उपचारत छन् ।

    मन्त्रालयका अनुसार हाल देशैभरीका आइसीयुमा ७९६ जना र भेन्टिलेटरमा १८४ जनाको उपचार भइरहेको छ ।

    त्यस्तै बुधवार देशैभरी १ लाख ९५ हजार २११ जनाले कोरोना भाइरस विरुद्धको खोप लगाएको पनि मन्त्रालयले जानकारी दिएको छ ।

    नेपालमा हालसम्म दुवै विधिबाट गरिएको कूल ४० लाख ८३ हजार ९९८ नमुना परीक्षणमा हालसम्म संक्रमित हुनेको संख्या ७ लाख ९५ हजार ३९१ पुगेको छ ।

    फेसबुक प्रतिक्रिया
    सम्बन्धित शीर्षकहरु