कांग्रेसलाई नसोचेको आइलाग्यो तर पनि हामी आत्तिएका छैनौं – कोषाध्यक्ष पाण्डे

न्यूजलाईन्स् मिडिया संवाददाता
प्रकाशित मिति : १६ भाद्र २०७८, बुधबार १९:१४

काठमाडौ । नेपाली कांग्रेस कास्कीकी कोषाध्यक्ष लक्ष्मी पाण्डेले राजनीतिक परिस्थिति बदलिएपछि कांग्रेसलाई सत्ताको अवसर आए पनि कांग्रेस नमात्तिएको बताएकी छिन् ।
उनले कांग्रेस पुरानो र लोकतान्त्रिक पार्टी भएकाले बेलामौका यस्ता अवसर आइरहने पनि जनाइन् । ‘राजनीतिमा कहिले मौका आउँछ, कहिले गुम्छ स्वभाविक हो तर कुनै पनि अवस्थामा आत्तिनु र मात्तिनु हुँदैन’ उनले भनिन् ‘नेकपालाई जनताले २०७४ सालमा त्यत्रो मतदान गरेका थिए, उ मात्तियो र अहिले सर्वत्र आलोचित भयो ।’ उनले कम्युनिष्टको नाममा राजनीति गर्न अब उनीहरुलाई गाह्रो भएको समेत टिप्पणी गरिन् । हिजोको दिनमा जनतालाई ढाँटेर र फकाएर मत ल्याए पनि अब उनीहरुसँग आगामी निर्वाचनमा जाँदा ढाँट्ने कुरा पनि सकिएको बताइन् ।
‘अहिले कांग्रेसलाई जनताले एउटा वैकल्पिक पार्टीको रुपमा हेरेका छन्, यसको अर्थ देशमा कांग्रेस नै चाहिने रहेछ भन्ने पुष्टि भएको छ’ उनले थपिन् ‘ जुनसुकै आन्दोलनको नेतृत्व पनि कांग्रेसले गरेको छ र देशलाई असहज अवस्थाबाट सहज बनाउने कांग्रेसलाई कसैले पनि बिर्सन मिल्दैन ।’ उनले केपी शर्मा ओलीको ४० महिना २५ दिनको कार्यकाल हावादारी गफमै बितेको दाबी गरिन् । ‘त्यस्ता उरन्ठेउला गफ गरेर जनतालाई भ्रममा पार्ने दिन पनि गए’ पाण्डेले भनिन् ‘ अब जसले काम गरेर जनताको मन जित्छ उही पार्टीले देशको नेतृत्व गर्छ, यो जिम्मेवारी कांग्रेसलाई आएको छ ।’
उनले वर्तमान सरकारको आलोचना गर्ने बेला भइनसकेको बताइन् । सरकार भर्खरै बनेकाले केही पनि गरेन भनेर भनिहाल्ने समय नआएको उनको बुझाई छ । उनले प्रधानमन्त्री शेरबहादुर देउवाले ओलीले जस्तो संविधान, कानुन र विधि मिचेर मनखुशी नगर्ने समेत ठोकुवा गरेकी छिन् । उनले नेपाली कांग्रेसको महाधिवेशनको प्रक्रिया अघि बढिसकेकाले महाधिवेशन नहोला कि भनेर कसैले पनि शंका गर्न नहुनेमा जोड दिइन् । बीचमा विभिन्न कारणले महाधिवेशन हुन नसकेको स्विकार्दै उनले भनिन् ‘अब पार्टीमा नयाँ नेतृत्व आउँछ, उसले पार्टीलाई मात्र होइन देशलाई नै सही दिशामा लाने छ ।’ उनले पार्टीमा युवा नेताको वहस चलिरहेकोमा पनि फरक मत राख्दै भनिन् ‘युवा नेता भनेर नागरिकता र उसको उमेर हेरिने होइन, उसले के काम गर्न सक्छ र हिजो के गरेको थियो त्यसको मूल्यांकन हुने हो ।’ उनले महाधिवेशनबाट पार्टीमा देखिएको गुटवन्दीको पनि अन्त्य हुने बताइन् ।
‘आपसी द्धन्द्ध हुँदा कस्तो परिणाम आउँदो रहेछ भन्ने कांग्रेसले भोगिसकेको छ त्यसैले पनि ती कुरालाई पार्टीले ख्याल गर्दै आगामी संघ, प्रदेश र स्थानीय तहको निर्वाचनको तयारी गर्नुपर्छ’ उनले भनिन् ‘महाधिवेशनमा म पनि माथ्लो पदमा जाने छु तर अहिले नै उम्मेदवारी घोषणा गर्ने बेला भइसकेको छैन ।’

फेसबुक प्रतिक्रिया
सम्बन्धित शीर्षकहरु