
काठमाडौँ, ३१ भदौ । नेपाल ट्रिपर तथा ट्रक व्यवसायी समितिले दोस्रो सम्पर्क कार्यालय बनेपाको भैँसेपाटीमा स्थापना गरिएको छ ।
काठमाडौँको कलंकीमा केन्द्रीय कार्यालय रहेको उक्त समितिले पहिलो सम्पर्क कार्यालय धादिङको गल्छीमा स्थापना गरेपनि बुधबार दोस्रो सम्पर्क कार्यालय बनेपामा स्थापना गरेको हो । धादिङमा स्थापना गरिएको सम्पर्क कार्यालय पश्चिम क्षेत्र र बनेपामा राखिएको कार्यालय पूर्व क्षेत्रका व्यवसायीलाई लक्षित गरिएको हो ।
उक्त कार्यालयको समितिका संस्थापक अध्यक्ष तथा नेपाल यातायात राष्ट्रिय महासंघका उपाध्यक्ष यादवलाल श्रेष्ठ र समितिका अध्यक्ष दिलबहादुर श्रेष्ठले संयुक्त रुपमा उद्घाटन गर्नुभयो ।
कार्यक्रममा समितिका संस्थापक अध्यक्ष यादवलाल श्रेष्ठले मुलुकको विकासको मुख्य आधार टिपर तथा ट्रक भएको भन्दै यसलाई सहज रुपमा सञ्चालनको व्यवस्था गर्न राज्यले सहजीकरण गर्नुपर्ने बताउनुभयो ।
पूर्व क्षेत्र सम्पर्क कार्यालय स्थापनाको अवसरमा समितिमा आवद्ध हुन चाहने नयाँ सदस्यको ४० प्रतिशत छुटको व्यवस्था गरिएको छ । यस्तै, अर्को समितिबाट आउन चाहनेको लागि ६० प्रतिशत छुटको व्यवस्था गरिएको छ । उक्त छुट आगामी असोज ७ गतेसम्मका लागि मात्र लागू हुनेछ ।
कार्यालय उद्घाटन समारोहमा समितिका पूर्व अध्यक्ष, पदाधिकारी, सचिवालय सदस्य लगायत व्यवसायीहरुको उपस्थिती रहेको थियो ।


