
काठमाडौं । पछिल्लो २४ घण्टामा देशैभरी ७९२ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा गरिएको ९,६१९ नमुना परीक्षणमा ७९२ जनामा संक्रमण पुष्टि भएको हो ।
त्यसैगरी पछिल्लो २४ घण्टामा ९१० जना कोरोना संक्रमणबाट मुक्त भएका छन् । थप ९१० जना संक्रमणबाट मुक्त भएसँगै हालसम्म निको हुनेको संख्या ७ लाख ७७ हजार ७४१ पुगेको छ ।
त्यस्तै पछिल्लो २४ घण्टामा १४ जनाको मृत्यु भएको छ । पछिल्लो थप १४ जनासहित हालसम्म कोरोना संक्रमणबाट ज्यान गुमाउनेको संख्या ११ हजार २५७ पुगेको छ ।
मन्त्रालयका अनुसार हाल देशैभरीका होम आइसोलेशनमा १३ हजार ४५९ जना र विभिन्न संस्थागत आइसोलेसनमा रहेका १०९५ जनासँगै देशैभरी १४ हजार ५५४ जना सक्रिय संक्रमित रहेका छन् । ती मध्ये ३०६ जना आइसीयु र १०२ जनाको भेन्टिलेटरमा उपचार भइरहेको छ ।
त्यसैगरी नेपालमा हालसम्म ८३ लाख ८१ हजार ७१० जनाले पहिलो मात्रा र ६४ लाख ६८ हजार ७७५ जनाले दोस्रो मात्राको खोप लगाइसकेका छन् । साथै पछिल्लो २४ घण्टामा ६९ हजार ८२४ जनाले कोरोनाविरुद्धको खोप लगाएको पनि मन्त्रालयको विवरणमा उल्लेखछ ।


