काठमाडौं । सनराइज युथ क्लबले लमजुङको राईनास नगरपालिका–०५ तीनपिप्लेमा वृहत् सांस्कृतिक कार्यक्रम गर्ने भएको छ ।
माघ ५ गते आयोजना गरिने कार्यक्रममो प्रमुख आकर्षणका रूपमा चर्चित सञ्चारकर्मी कृष्ण कँडेल र इन्द्रेणी टीम रहने छन् । पछिल्लो समय नेपाली दर्शकले अत्यधिक रुचाएका कँडेलले सांस्कृतिक कार्यक्रम इन्द्रेणीमार्फत कयौँ दुःखी र असहाय नेपालीलाई आर्थिक सहयोग उपलब्ध गराउँदै आएका छन् ।
उपचार नपाएर अस्पतालका शय्यामा छट्पटिरहेका बिरामीहरूको आर्थिक सहयोगका निम्ति उक्त कार्यक्रमको आयोजना गर्न लागिएको सनराइज युथ क्लबका अध्यक्ष हरिराम अधिकारीले जानकारी दिए ।
‘लमजुङमा रहेका जति पनि अपाङ्ग, असाहय तथा दिनदुःखीलाई हाम्रो यस सानो प्रयासले थप राहत पुग्नेछ,’ अधिकारीले भने, ‘कार्यक्रममा छिमेकी जिल्ला गोरखा र सम्पूर्ण जिल्लाबासीहरूलाई सहभागी भइदिन हार्दिक अपिल गर्दछु ।’
२०८० मंसिर १३ - बुधबार
