
–शिव अधिकारी
धेरै छन चटकी आज डस्छन निर्धा चुनी चुनी
लुट्छन संपत्ति ती जम्मै भ्रष्टाचारी भए धनि
गरिवहरुले यिन्कै भरोसा खोज्न पुग्दछन
मौका मिलाउदै यिनै फेरी तम्सेर डस्दछन ।। १ ।।
कोही अजिर्ण छन खाई धेरै भोकै निदाउँछन
नांगो शरिर जाडोमा कठ्यांग्रिदै विताउछन
डस्छ नेता यिनैलाई रित्तो पेट भए पनि
विचरा कति हो बाचुन दुःखका दिन हो गनि ।। २ ।।
केही नौलो नयाँ फेरी देखिएन कतै पनि
गाउँलेहरु पर्खन्छन भोली क्यै हुन्छ की भनी
तर त्यस्तो कुनै भोली आएन आँउदैन की
खान लाउन टारियो खेत बारी सबै सकी ।। ३ ।।
नमिठो लाग्छ यो जीवन कष्टको साधना बन्यो
सुख सयल जे जे हो सधैको चाहना भयो
खाली पेटछ बच्चाको भोकले छट्पटाउछन
के खान दिनु ख्वै ऐले रित्तो थाल ठटाउछन ।। ४ ।।
यो सोचि अब क्यै गर्न लाग हे अगूवा अब
यो धर्ति स्वर्गको टुक्रा बनाउ हुन्छ गौरव
युवाको जोश देशैमा पौखौ रंगिन्छ यो भूमि
नफाल समय खेर विदेशमा घुमी घुमी ।। ५ ।।


