
गोरखा । गोरखाको भीमसेन थापा गाउँपालिका अध्यक्ष लोकप्रसाद बञ्जराले एकलौटी गरेको भन्दै २० जना सदस्यहरूले गाउँसभा नै बहिष्कार गरेका छन्। गाउँसभामा अध्यक्ष बञ्जराले एकलौटी गरेको भन्दै गाउँपालिका उपाध्यक्ष अमृतादेवी भट्ट वस्तीसहितले बहिष्कार गरेका हुन्
गाउँपालिकाको योजना तर्जुमा समितिको संयोजक उपाध्यक्ष रहने व्यवस्था भए पनि अध्यक्ष बञ्जराले हस्तक्षेप गरेको, उपाध्यक्षलाई भूमिका बिहीन बनाइएको, उपाध्यक्षकै संयोजकत्वमा हुने न्यायीक समितिमा पनि परामर्श नगरी अध्यक्षले सदस्य प्रस्ताव गरेको, लेखा समितिमा एकलौटी गरेको भन्दै विरोध भएको हो।
आज शुक्रबार २० सदस्यले नै अध्यक्ष बञ्जराको कार्यशैलीप्रति विज्ञप्ति जारी गरी विरोध जनाएका छन्। गाउँसभा सदस्यहरूले स्थानीय सरकार संचालन ऐन २०७४ को दफा १७ को उपदफा ३ बमोजिम स्पष्ट रुपमा कार्यपालिकाको बैठकको निर्णय सर्वसम्मति गर्नुपर्ने व्यवस्थापन हुँदाहुँदै प्रयास नै नगरेको र आफूखुसी निर्णय गरेको बताएका छन्।
उनीहरूले गाउँपालिका अध्यक्षलाई आगामी दिनमा यसखाले क्रियाकलापबाट सिर्जना हुने परिस्थितिको सामना गर्न पनि चेतावनी दिएका छन्।


