
राष्ट्रिय खेलकुद परिषद्का सदस्य–सचिव टंकलाल घिसिङले भरतपुर मेयर कप अन्तरविद्यालय क्रिकेट प्रतियोगितालाई स्कुल टु वल्र्ड कप भन्ने नारासाथ अगाडि बढाउनु पर्ने बताएका छन् ।
भरतपुरमा शुक्रबारदेखि सुरु भएको प्रतियोगिताको उद्घाटन गर्दै सदस्य–सचिव घिसिङले भने– ‘यो प्रतियोगितालाई निरन्तरता दिदै स्कुल टु वल्र्ड कप भन्ने नारासाथ अगाडि बढाउन आग्रह गर्छु ।’
सदस्य–सचिव घिसिङले यो प्रतियोगिता नेपाली क्रिकेटमा स्कुल तहमा क्रिकेटको विकासमा ऐतिहासिक पहलको थालनी भएको बताउदै आयोजक भरतपुर महानगरपालिका र साझेदार सबैलाई बधाइ दिदै आभार प्रकट गरे । उनले यो पवित्र उद्देश्यलाई आगामी दिनमा थप निरन्तरतासहित एउटा योजनासाथ अगाडि बढाउनु पर्नेमा जोड दिए ।
सदस्य–सचिव घिसिङले शुक्रबारै भरतपुर नगरपालिकाकी मेयर रेणु दाहालसहितको टोलीसंग गौतम बुद्ध अन्तर्राष्ट्रिय क्रिकेट रंगशालाको पनि निरीक्षण गरेका थिए । राष्ट्रिय गौरवको आयोजनामा परेको उक्त रंगशाला निर्माण सम्पन्न गर्ने विषयमा मेयर दाहालसंग छलफल पनि भएको थियो । सदस्य–सचिव घिसिङले रंगशाला निर्माण सम्पन्न गर्न संघीय सरकारबाट लिड बजेट उपलब्ध गराउन अनुरोध गर्ने प्रतिबद्धता व्यक्त गरे ।
त्यस्तै सदस्य–घिसिङले भरतपुरमा शुक्रबारैदेखि सुरु भएको ८० औं जिल्लास्तरीय तेक्वान्दो प्रतियोगिताको उद्घाटन गर्नुका साथै भरतपुर कभर्डहलको पनि निरीक्षण गरेका थिए ।


