काठमाडौँ, २८ चैत्र । नेपाली नयाँ वर्ष २०८१ को पूर्वसन्ध्यामा राजधानीको प्रमुख पर्यटकीय गन्तव्य ठमेलमा सडक महोत्सव हुने भएको छ ।
ठमेल पर्यटन विकास परिषद्ले बुधबार पत्रकार सम्मेलन गरी नयाँ वर्ष २०८१ को पूर्वसन्ध्यामा चैत ३० गते शुक्रबार साँझ ठमेल सडक महोत्सव आयोजना गर्न लागेको जानकारी दिएको हो ।
पत्रकार सम्मेलनमा बोल्दै परिषद्का उपाध्यक्ष एवम् महोत्सवका संयोजक प्रश्रय राजभण्डारीले विगत वर्षझैँ यसवर्ष पनि ‘न्यू इयर इभ ठमेल सडक महोत्सव’ आयोजना गर्न लागेको जानकारी दिए । ठमेल क्षेत्रको पर्यटन प्रवद्र्धन गर्नका लागि सडक महोेत्सवको आयोजना गरिएको उनको भनाई छ ।
संयोजक राजभण्डारीले चैत ३० गते शुक्रबार साँझ पर्यटनमन्त्रीसहित विभिन्न पर्यटनसँग सम्बन्धीत संघ संस्थाको उपस्थितीमा ठमेल सडक महोत्सव गर्न लागिएको बताए । सोही दिन साँझ ठमेलभित्र उत्पादित सामाग्री विक्रिवितरणका साथसाथै सांस्कृतिक कार्यक्रम हुनेछन् ।
पत्रकार सम्मेलनमा परिषद्का अध्यक्ष भविश्वर शर्माले ठमेललाई राष्ट्रिय तथा अन्तर्राष्ट्रिय आकर्षक गन्तव्यको रुपमा परिचित गराउने उदेश्यका साथ सडक महोत्सव आयोजना गर्न लागिएको बताए ।
अध्यक्ष शर्माले महोत्सवका लागि सुरक्षा निकायसँग समन्वय गरेर ठमेलभित्रको सुरक्षालाई मजबुद बनाइएको बताए । उनले ठमेललाई सुन्दर,आकर्षक पर्यटकीय गन्तव्यका रुपमा विकास गर्नका लागि ठमेलभित्रको तारलाई व्यवस्थापन र सडक पिच तथा मर्मत गरिसकिएको बताए ।
यस्तै,परिषद्ले काठमाडौँ महानगरपालिका र नेपाल प्रहरीको समन्वयमा ठमेल क्षेत्रभित्र पर्याप्त सिसिटिभि जडान गरिसकेको अध्यक्ष शर्माको भनाई छ । नयाँ वर्षको पूर्वसन्ध्यामा ठमेलभर कार्यक्रम हुने भएकाले मान्छेको चाप बढ्दै गएपछि ट्राफिक व्यवस्थापनमा समेत समस्या हुने भएकाले बाहिरबाट ठमेल भित्रिने सवारी साधनले बैकल्पिक बाटो प्रयोग गर्नसमेत परिषद्ले आग्रह गरेको छ ।
२०८२ बैशाख ५ - शुक्रबार
