वाइसीएचका सक्षम शाक्यले पुष्पराज शाक्य स्मृति तेश्रो ट्राइ सिरिज टेबलटेनिस प्रतियोगिताको यु–१६ ब्वाइज सिंगल्समा स्वर्ण जितेका छन् ।
उनले फाइनलमा आईएससीका स्वयंलाई ३–२ को सेटमा पराजित गरे । आईएससीका सुप्रिन्स महर्जन र खोल्छका उसान वज्राचार्य तेश्रो भए ।
खोल्छ पुखु खेलकुद समितिको आयोजनामा भएको प्रतियोगिताको पुरुष खुला सिंगल्समा वाइसीएचका सन्जिल शाक्यले स्वर्ण, आईएससीका राजेन्द्र वज्राचार्यले रजत तथा आईएससीका खोल्छका नदिमरत्न शाक्य र अशोक महर्जनले कांस्य हात पारे ।
पुरुष डबल्समा वाइसीएचका सुमन शाक्य र सन्जिल शाक्यको जोडी पहिलो, खोल्छका नदिमरत्न शाक्य र समिप श्रेष्ठको जोडी दोश्रो, आईएससीका राजेन्द्र वज्राचार्य र मनीष खरेल तथा अशोक महर्जन र सुशिल वज्राचार्यको जोडी तेश्रो भए । पुरुष टिम इभेन्टमा वाइसीएच, आईएससी र खोल्छ क्रमशः शीर्ष तीन स्थानमा रहे ।
विजेतालाई ललितपुर महानगरपालिका वडा ११ का अध्यक्ष अरोजकुमार खड्गी, टेबलटेनिसका मुख्य प्रशिक्षक राजेन्द्र कपाली, ललितपुर जिल्ला टेबलटेनिस संघका अध्यक्ष आशिष अवालेलगायतले एक कार्यक्रमबीच पुरस्कृत गरे ।
२०८१ भाद्र ३० - आईतवार
