
काठमाडौं। काठमाडौं महानगरपालिकाले टुँडिखेल पश्चिमतर्फको महांकाल मन्दिर परिसर चौघेरा सत्तलको पुनर्निर्माण सुरु गरेको छ। महानगरका उपमेयर सुनिता डंगोलले सोमबार जग पूजा तथा शिलान्यास गरेर निर्माण कार्य प्रारम्भ गरिन्। सम्पदा तथा पर्यटन समिति संयोजक रहेका ८ नम्बर वडाध्यक्ष आशामान संगत, २२ का अध्यक्ष चिनीकाजी महर्जन लगायत गुठियार तथा पुजारीहरूले पूजा गरेर शिलान्यास गरेका हुन्। महानगरले यो सत्तल पुनर्निर्माणका लागि १० करोड ५ लाख १० हजार रुपैयाँमा विनायक|एसपी|बोहोरा जेभी निर्माण कम्पनीसँग सम्झौता गरेको छ। सम्पदा तथा पर्यटन विभाग प्रमुख कुमारी राईका अनुसार परम्परागत निर्माण सामग्री र शैली पुनर्निर्माणको मुख्य विशेषता रहेको छ।


