
नर्वे — गैरआवासीय नेपाली संघ (एनआरएनए) नर्वेको आगामी (२०२५–२०२७) कार्यकालको लागि श्रद्धा सिंह थापाले अध्यक्ष पदमा आफ्नो औपचारिक उम्मेदवारी घोषणा गर्नुभएको छ । सानै उमेरमा नर्वे आएकी श्रद्धा अहिले युवापुस्ता, महिलाहरू र समावेशी नेतृत्वको सशक्त आवाजका रूपमा अगाडि बढिरहेकी छिन् ।
१४ वर्षको उमेरमा नर्वे आएकी श्रद्धाले पछिल्ला ११ वर्षमा नेपाली समुदायसँग निकट सम्पर्क राख्दै सामाजिक योगदान पुर्याउँदै आएकी छन् । उम्मेदवारी घोषणा गर्दै उनले भनिन्, ‘यो केवल उम्मेदवारी होइन, यो हाम्रो समुदायप्रतिको प्रतिबद्धता हो’ ।
थापाले पहिलो पुस्ताका नेपालीहरूलाई नर्वेजियन भाषा सिकाइ, एकीकरणमा सहयोग र आवश्यक सेवामा पहुँच दिलाउने, दोस्रो र तेस्रो पुस्ताका लागि हाम्रो संस्कृति र पहिचान जोगाउने, कन्सुलर सेवा र व्यवहारिक सहयोग सबैको लागि सहज र समान बनाउने आफ्नो दृढ़ संकल्प रहेको बताइन् ।
त्यस्तै थापाले हाम्रा विविध समुदायका सबै आवाजलाई प्रतिनिधित्व दिने, जहाँ प्रत्येक व्यक्ति सम्मानित र समावेशित महसुस गर्न सकून्, युवापुस्ता, महिला, र उद्यमीहरूलाई सशक्त बनाउने उनको लक्ष्य रहेको छ ।
‘म नयाँ सोच र दृष्टिकोण लिएर आएकी छु, जहाँ परम्पराको मूल्य र नयाँ पुस्ताको ऊर्जा एकसाथ जोडिन्छ । एनआरएनए अब दुई पुस्ताबीचको पुल बन्नुपर्ने समय आएको छ,’ श्रद्धा सिंह थापाले भनिन् ।


