तेस्रो प्रयासमा सुदूरपश्चिमको सपना पूरा, बन्यो एनपीएल च्याम्पियन⚡दक्षिण एसियाली आईटीएफ तेक्वान्दोको तयारी पूरा⚡हरिबोधनी एकादशी आज : तुलसी विवाहदेखि माङ्गलिक कार्यको शुभारम्भसम्म⚡महायज्ञमा रोका परिवारको प्रेरणादायी सहयोग : शिक्षा सुधारका लागि १६ लाख ६६ हजार ६६६ रुपैयाँ दान⚡सौन्दर्य व्यवसायमा स्प्राकलको छलाङ, पहिलो र दोस्रो शाखा दुवै महराकै हातबाट उद्घाटन⚡बहिरा फुटबल टोली दक्षिण कोरिया जाने⚡जिग्री सेकुवाको १०औँ तथा सबैभन्दा ठूलो आउटलेट धुम्बाराहीमा⚡दोहामा एनआरएनए मध्यपूर्व सम्मेलनको तयारी अन्तिम चरणमा⚡अभियान लघुवित्तको वार्षिकोत्सवमा वृद्धाश्रमलाई खाद्यान्न सहयोग⚡कर प्रणालीलाई लगानी, उत्पादन र रोजगारी प्रवर्द्धनको माध्यम बनाउनुपर्छ : चेम्बर अध्यक्ष अग्रवाल

एनपीएल : सुदूरपश्चिम रोयल्सले जनकपुर बोल्ट्सलाई ६ विकेटले पराजित

न्यूजलाईन्स् मिडिया संवाददाता
प्रकाशित मिति : २०८२ मंसिर १३ गते, शनिबार २०:२७

सुदूरपश्चिम रोयल्सले जनकपुर बोल्ट्सलाई ६ विकेटले पराजित गर्दै सिद्धार्थ बैंक नेपाल प्रिमियर लिग (एनपीएल) को प्लेअफमा स्थान सुनिश्चित गरेको छ। शनिबार भएको भिडन्तमा शानदार प्रदर्शन गर्दै सुदूरपश्चिमले लगातार पाँचौँ जित दर्ता गर्‍यो र लिग चरणमा अपराजित रहँदै प्लेअफ पुग्ने पहिलो टोली बन्न सफल भयो।

पाँच खेलबाट १० अंक जोडेको सुदूरपश्चिम तालिकाको शीर्षमा उक्लिएको छ। अब उसले लिग चरणमा चितवन राइनोज र विराटनगर सुपर किंग्ससँग प्रतिस्पर्धा बाँकी छ।

उता, लगातार चौथो हारसँगै साविक विजेता जनकपुर बोल्ट्सको प्लेअफ यात्रा निकै चुनौतीपूर्ण बनिएको छ। जनकपुरले अब चितवन, लुम्बिनी र कर्णालीविरुद्धका तीन महत्वपूर्ण खेल खेलेर मात्रै थप सम्भावना खोज्नुपर्नेछ।

जनकपुरले दिएको १४६ रनको लक्ष्य सुदूरपश्चिमले १७.४ ओभरमा चार विकेटको क्षतिमा सहजै पूरा गर्‍यो। प्रारम्भिक ओभरमै मात्र एक रन हुँदा दुई विकेट गुमाएर दबाबमा परेको अवस्थामा तेस्रो विकेटका लागि विनोद भण्डारी र इशान पाण्डेले ९२ रनको उत्कृष्ट साझेदारी गर्दै टीमलाई उकासे।

इशान पाण्डे उत्कृष्ट लयमा रहे—३३ बलमा सात चौका र एक छक्का प्रहार गर्दै ५६ रन जोडे। उनी ६५ रनमा आउट भए। विनोद भण्डारीले पनि ४९ बलमा ४२ रन बनाए। जस ब्राउन गोल्डेन डकमा आउट भए भने क्रिस लिन मात्र एक रनमा फर्किए। अन्त्यतिर हरमित सिंह २५ तथा कप्तान दीपेन्द्रसिंह ऐरी १० रनमा अविजित रहे।

जनकपुरका माज सदाकतले दुई विकेट लिए भने सञ्जय कृष्णमूर्तिले एक विकेट हात पारे।

यसअघि टस जितेर ब्याटिङ गरेको जनकपुरले ८ विकेटमा १४५ रन बनाएको थियो। सञ्जय कृष्णमूर्तिले ३७ बलमा चार चौका र दुई छक्का प्रहार गर्दै अर्धशतक पूरा गरे। जान निकोल लफ्टी इटोनले ३३ बलमा ३९ रन बनाए। ओपनर माज सदाकत १२ रनमा आउट भए।

आशिफ शेख डक, शुभ कंसाकार शून्य तथा आदित्य महता १५ रनमा आउट भए। कप्तान वायन पार्नेल १४ रनमा क्याच आउट भए भने रुपेश सिंह एक रनमा अविजित रहे।

सुदूरपश्चिमका अविनास बोहराले प्रभावशाली बलिङ गर्दै चार विकेट झारे। स्कट कुगेलाइनले तीन विकेट र दीपेन्द्रसिंह ऐरीले एक विकेट लिए। उत्कृष्ट ब्याटिङ प्रदर्शनका आधारमा इशान पाण्डे ‘प्लेयर अफ द म्याच’ घोषित भए।

आजै सम्पन्न पहिलो खेलमा पोखरा एभेन्जर्सलाई ३ विकेटले हराउँदै लुम्बिनी लायन्सले पनि प्लेअफको आशा जोगाइराखेको छ।

रविवार एनपीएलमा एक मात्र खेल हुनेछ—अपराह्न ३:३० बजे कर्णाली याक्स र काठमाडौं गोर्खाज आमनेसामने हुनेछन्।

फेसबुक प्रतिक्रिया
सम्बन्धित शीर्षकहरु