
काठमाडौं । नेपाल उद्योग वाणिज्य संघ काठमाडौंको उपाध्यक्षमा उज्वल जंग पराक्रम शाह निर्वाचित भएका छन् । शनिबार सम्पन्न संघको पाँचौँ वार्षिक साधारण सभा तथा तेस्रो अधिवेशनबाट शाह उपाध्यक्ष पदमा निर्वाचित भएका हुन् ।
अधिवेशनबाट शाहसँगै दुर्गाराज श्रेष्ठ र राजेन्द्र शेरचन पनि निर्विरोध निर्वाचित भएका छन् । यसैगरी संघको अध्यक्षमा रमानाथ श्रेष्ठ निर्विरोध चयन भएका छन् । नयाँ नेतृत्व चयनसँगै काठमाडौंका व्यवसायीहरूबीच संघप्रति थप अपेक्षा बढेको छ ।
उपाध्यक्ष पदमा निर्वाचित भएपछि शाहले साना तथा मझौला व्यवसायीको हकहितका लागि प्रभावकारी रूपमा आवाज उठाउने प्रतिबद्धता जनाएका छन् । उनले व्यवसायीहरूले भोगिरहेका कर, प्रशासनिक झन्झट, लगानी असुरक्षा तथा बजार व्यवस्थापनका समस्यालाई सम्बन्धित निकायसम्म सशक्त रूपमा पु¥याउने बताएका छन् ।
निर्वाचनपछि सञ्चारकर्मीसँग कुरा गर्दै शाहले भने, “काठमाडौं जिल्लाभित्र रहेका साना तथा मझौला व्यवसायी अहिले विभिन्न चुनौतीसँग संघर्ष गरिरहेका छन् । ती व्यवसायीको आवाजलाई संघमार्फत प्रभावकारी रूपमा उठाउने मेरो पहिलो प्राथमिकता हुनेछ ।”
उनले निजी क्षेत्र र सरकारबीच विश्वासको वातावरण निर्माण गर्न आवश्यक रहेको पनि बताए । “व्यवसायीलाई कर तिर्ने माध्यमका रूपमा मात्रै होइन, देशको अर्थतन्त्र चलाउने साझेदारका रूपमा हेर्नुपर्छ,” शाहले भने, “उद्यमशीलता र लगानीको वातावरण सुधार भए मात्रै आर्थिक गतिविधि चलायमान हुन्छ ।”
शाहले संघलाई व्यवसायीको साझा प्लेटफर्मका रूपमा अझ सक्रिय बनाउने प्रतिबद्धता समेत व्यक्त गरेका छन् । उनले युवा उद्यमी, स्टार्टअप व्यवसाय तथा नयाँ लगानीकर्तालाई प्रोत्साहन गर्ने वातावरण निर्माणमा पनि आफूले भूमिका खेल्ने बताएका छन् ।
नयाँ नेतृत्व चयनसँगै संघले काठमाडौंका व्यवसायीका समस्या समाधान, निजी क्षेत्रको मनोबल वृद्धि तथा आर्थिक गतिविधिलाई चलायमान बनाउन सक्रिय भूमिका खेल्ने अपेक्षा गरिएको छ ।


