
विश्व फुटबल महासंघ (FIFA) ले सन् २०२६ को विश्वकप खेल हेर्न आउने दर्शकका लागि पानीको बोतलसम्बन्धी नियममा फेरबदल गरेको छ।
यसअघि पुनः प्रयोग गर्न मिल्ने (Reusable) पानीका बोतल स्टेडियमभित्र लैजान नपाइने निर्णय गरेको फिफाले अब निश्चित मापदण्डभित्रका एकपटक प्रयोग गर्न मिल्ने (Single-use) नरम प्लास्टिकका पानीका बोतल लैजान अनुमति दिएको जनाएको छ।
फिफाका अनुसार दर्शकले सुरक्षा मापदण्ड पूरा गर्ने साना प्लास्टिकका पानीका बोतल स्टेडियममा लैजान सक्नेछन्। यस निर्णयपछि अत्यधिक गर्मीका कारण दर्शकको स्वास्थ्यमा असर पर्ने चिन्ताबीच केही राहत मिल्ने अपेक्षा गरिएको छ।
यसअघि फिफाले पुनः प्रयोग गर्न मिल्ने बोतल प्रतिबन्ध लगाउँदा समर्थकहरूबाट व्यापक आलोचना भएको थियो। आलोचकहरूले गर्मीको समयमा पानीको सहज पहुँच आवश्यक रहेको भन्दै निर्णय पुनर्विचार गर्न माग गरेका थिए।
फिफाले भने खेलाडी, रेफ्री र दर्शकको सुरक्षालाई ध्यानमा राखेर बोतलसम्बन्धी नियम बनाइएको जनाएको छ। साथै स्टेडियम वरपर पानी वितरण केन्द्र, हाइड्रेसन स्टेशन तथा अन्य गर्मी न्यूनीकरणका व्यवस्था गरिने पनि बताएको छ।
– स्मृत न्यूज डेस्क


