
चितवन — राष्ट्रिय स्वतन्त्र पार्टी (रास्वपा) को पहिलो महाधिवेशन नयाँ नेतृत्व र नीतिगत दिशासहित सम्पन्न भएको छ। चितवनको भरतपुरमा गत आइतबारदेखि सुरु भएको महाधिवेशन शुक्रबार पदाधिकारी चयनसँगै समापन भएको हो।
महाधिवेशनबाट पार्टी सभापतिमा रवि लामिछाने र उपसभापतिमा स्वर्णिम वाग्ले निर्विरोध निर्वाचित भएका छन्। महिला उपसभापतिमा भने सोविता गौतम विजयी भएकी छन्। शुक्रबार सम्पन्न दोस्रो चरणको निर्वाचनमा उनले डा. तोसिमा कार्कीलाई पराजित गर्दै उक्त पदमा निर्वाचित भएकी हुन्।
यस्तै, महामन्त्री पदमा विपिन आचार्य निर्वाचित भएका छन्। उक्त पदका लागि विपिनसँगै मनिष झा, सागर ढकाल र गणेश कार्की प्रतिस्पर्धामा रहेका थिए।
सहमहामन्त्री (खुला) तर्फ हरि ढकाल र असिम शाह निर्वाचित भएका छन् भने सहमहामन्त्री (महिला) पदमा निशा डाँगी विजयी भएकी छन्।
पहिलो महाधिवेशनमार्फत रास्वपाले नयाँ नेतृत्व चयनसँगै आगामी राजनीतिक कार्यदिशा र नीतिगत प्राथमिकतासमेत तय गरेको जनाएको छ।


