
काठमाडौं, २५ अगस्ट २०२६। — युवा खेलाडीहरूको उत्साहपूर्ण सहभागिता, उत्कृष्ट खेल प्रदर्शन र उच्च खेल भावनाबीच ८ औँ SG सिनियर अन्तरविद्यालय फुटसल प्रतियोगिता २०२६ सफलतापूर्वक सम्पन्न भएको छ। स्वोस्तिश्री गुरुकुल आई.बी. कन्टिन्युम स्कुलको आयोजनामा भएको प्रतियोगिताको समापन समारोह सम्पन्न गरिएको हो।
समापन समारोहको अध्यक्षता स्वोस्तिश्री गुरुकुल आई.बी. कन्टिन्युम स्कुलकी प्रबन्ध निर्देशक मीना महर्जनले गर्नुभएको थियो। कार्यक्रममा राष्ट्रिय खेलकुद परिषद्का बोर्ड सदस्य सुश्री ललिता नाथ प्रमुख अतिथिका रूपमा उपस्थित हुनुहुन्थ्यो।
समारोहमा विशेष अतिथिका रूपमा नेपाल महिला राष्ट्रिय फुटबल टोलीकी गोलरक्षक अञ्जना राना मगर, NSSF का संस्थापक अध्यक्ष प्रदीप जोशी, NSSF का उपाध्यक्ष तथा ब्राइट फ्युचर स्कुलका संस्थापक अध्यक्ष मोहन कार्की तथा **राष्ट्रिय खेलकुद परिषद्का पूर्वउपाध्यक्ष शिव कोइराला ‘ज्वाला’**को उपस्थिति रहेको थियो।
समापन समारोहलाई सम्बोधन गर्दै विद्यालयकी **प्राचार्य नेहा के.सी.**ले प्रतियोगितामा सहभागी सम्पूर्ण विद्यालय तथा खेलाडीहरूलाई बधाई दिँदै प्रतियोगितालाई सफल बनाउन सहयोग गर्ने प्रशिक्षक, शिक्षक, रेफ्री, कर्मचारी, स्वयंसेवक तथा सम्पूर्ण सहयोगीप्रति आभार व्यक्त गर्नुभयो। उहाँले विद्यालयस्तरबाटै खेलाडीहरूको प्रतिभा पहिचान, विकास र प्रोत्साहन गर्न यस्ता प्रतियोगिताले महत्वपूर्ण भूमिका खेल्ने बताउनुभयो।
त्यसैगरी, नेपाल महिला राष्ट्रिय फुटबल टोलीकी गोलरक्षक अञ्जना राना मगरले युवा खेलाडीहरूलाई आफ्नो प्रतिभा प्रदर्शन गर्ने, प्रतिस्पर्धात्मक अनुभव हासिल गर्ने र भविष्यमा खेलकुद क्षेत्रमा अघि बढ्ने अवसर प्रदान गरेकोमा आयोजक विद्यालयप्रति धन्यवाद व्यक्त गर्नुभयो। उहाँले विद्यालयस्तरका यस्ता प्रतियोगिताले नेपाली फुटबलको भविष्य निर्माणमा महत्वपूर्ण योगदान पुर्याउने विश्वास व्यक्त गर्नुभयो।
चार विधामा रोमाञ्चक प्रतिस्पर्धा
प्रतियोगितामा U 11y छात्र, U 11y छात्रा, U 12y छात्र तथा U 14y छात्र गरी चार विधामा विभिन्न विद्यालयका टोलीहरूले प्रतिस्पर्धा गरेका थिए। प्रतियोगिताभर खेलाडीहरूले उत्कृष्ट कौशल, अनुशासन, प्रतिस्पर्धात्मक भावना र खेल भावना प्रदर्शन गरेका थिए।
U 11y छात्रतर्फ रातो बंगला स्कुलले उपाधि जित्दा हिमशिखर स्कुल दोस्रो र रोजबड स्कुल तेस्रो भए।
U 11y छात्रातर्फ GEMS स्कुलले प्रथम स्थान हासिल गर्यो। रातो बंगला स्कुल दोस्रो र आयोजक स्वोस्तिश्री गुरुकुल तेस्रो भए।
U 12y छात्रतर्फ राई स्कुलले उपाधि हात पार्दा स्वोस्तिश्री गुरुकुल दोस्रो र कोहिनुर स्कुल तेस्रो भए।
त्यस्तै, U 14y छात्रतर्फ लोयल्टी एकेडेमी विजेता बन्यो। उज्ज्वल तारा स्कुल दोस्रो र रोजबड स्कुल तेस्रो स्थानमा रहे।
उत्कृष्ट खेलाडी तथा व्यक्तिगत पुरस्कार
प्रतियोगितामा उत्कृष्ट प्रदर्शन गर्ने खेलाडीहरूलाई विभिन्न व्यक्तिगत विधामा समेत सम्मान गरिएको थियो।
U 11y छात्रतर्फ स्वोस्तिश्री गुरुकुलका आर्नव राज भारती उत्कृष्ट खेलाडी, रातो बंगला स्कुलका सुबान्श श्रेष्ठ उत्कृष्ट गोलरक्षक तथा सोही विद्यालयका निर्विग्न ढकाल सर्वाधिक गोलकर्ता घोषित भए।
U 11y छात्रातर्फ पाठशाला नेपालकी सम्राज्ञी क्षेत्री उत्कृष्ट खेलाडी, स्वोस्तिश्री गुरुकुलकी श्रीम खरेल उत्कृष्ट गोलरक्षक तथा रातो बंगला स्कुलकी शिखा सुबेदी सर्वाधिक गोलकर्ता घोषित भए।
U 12y छात्रतर्फ राई स्कुलका योनातन राई उत्कृष्ट खेलाडी, स्वोस्तिश्री गुरुकुलका समीर बोहरा उत्कृष्ट गोलरक्षक तथा कोहिनुर स्कुलका प्रमिक मगर सर्वाधिक गोलकर्ता बने।
त्यसैगरी, U 14y छात्रतर्फ उज्ज्वल तारा स्कुलका केशव काफ्ले उत्कृष्ट खेलाडी, लोयल्टी एकेडेमीका समर्पण सेढाईं उत्कृष्ट गोलरक्षक तथा रोजबड स्कुलका लक्ष्य श्रेष्ठ सर्वाधिक गोलकर्ता घोषित भए।


