
तिमी केवल तिम्रै अहङ्कारका परिधि हौ
म मेरो आफ्नै चेतनाको अनन्त।
हामिबिच
‘म’ र ‘मेरो’ को एउटा भ्रमपूर्ण वृत्त थियो
जसको परिधिबाट आज म पूर्ण रूपले मुक्त भएकी छु।
जब जोडिएथ्यो सम्बन्ध
उसले आफ्ना तृष्णाको अनन्त भोक मेटायो
एउटा कृत्रिम आवरण ओढाइदियो मेरो अनुहारमा
सामाजिक न्याय र मर्यादाका उच्च वकालतभित्र
आफ्नै लालसाको भव्य रङ्गमञ्च सजायो उसले
मैले त्यही छललाई आफ्नो साँचो ईश्वर ठानेँ।
उसले भौतिक सुविधा र प्रपञ्चको तानाबाना बुन्यो
र झुन्ड्याइदियो मेरो गलामा
नीति र संस्कारको गह्रौँ साङ्ग्लो।
मैले त्यसैलाई जीवनको परम अनुशासन मानेर
आफ्ना सारा उन्मुक्त उडानहरूलाई एउटै सीमाभित्र कैद राखिरहेँ।
जब मैले मलाई यसरी खियाउदै गएको बुझे
वास्तवमा कोही कसैको हुँदो रहेनछ।
तिमी कहिल्यै मेरो हुन सकेनौ
तिमी आफ्नै अहङ्कारका बन्दी हौ
र म
अब सम्पूर्ण रूपले आफ्नै अस्तित्वकी मालिक भएकी छु।


