
रसुवा । नेपालका रेकर्डेट रक्तदाता एवम् नेपाल स्वयंसेवी रक्तदाता समाजका केन्द्रीय अध्यक्ष प्रेमसागर कर्माचार्यले रक्तदानमा अर्को नयाँ कीर्तिमान कायम गरेका छन्। रसुवाको कालिका गाउंपालिकामा सोमवार आयोजित रक्तदान कार्यक्रममा रक्तदाता कर्माचार्यले १८४ औं पटकको रक्तदान गरेर नयाँ कीर्तिमान कायम गरेका हुन्।
नेपाल स्वयंसेवी रक्तदाता समाज रसुवा शाखा र कालिका हिमालय एस.एल.सी. २०५६ व्याज समूहले संयुक्तरुपमा आयोजना गरेको उक्त कार्यक्रममा जम्मा ८६ जनाले रक्तदान गरेका थिए । कार्यक्रमका प्रमुख अतिथि बाबुलाल तामाङ, सभापति नेरेसो रसुवा र अध्यक्ष नागरिक समाज रसुवाले सर्वाधिक स्वयंसेवी शतक रक्तदातालाई कर्माचार्यलाई दोसल्ला ओढाई सम्मान(पत्र प्रदान गरेर सार्वजनिक सम्मान अभिनन्दन गरेका थिए।
त्यसैगरी कार्यक्रमका विशेष अतिथि एवं कालिका गाउँपालिका अध्यक्ष हरिकृष्ण देवकोटाले पनि कालिका गाउँपालिकाको तर्फबाट पनि दोसल्ला ओढाएर सम्मान(पत्र प्रदान गरेर अर्को सार्वजनिक सम्मान रक्तदाता कर्माचार्यलाई गरिएको थियोे। कालिका हिमालय एस.एल.सी. २०५६ ब्याजका अध्यक्ष रामप्रसाद डकाल र नेपाल स्वयंसेवी रक्तदाता समाज रसुवा जिल्ला शाखाका अध्यक्ष रामशरण गजुरेलको संयुक्त सभाध्यक्षतामा भएको उक्त कार्यक्रममा प्रमुख जनस्वास्थ्य कार्यालय धुन्चे रसुवाका झमप्रसाद आचार्य अतिथि रहेका थिए । रक्तदान गर्नुहुने स्वयंसेवी रक्तदाताहरूलाई कार्यक्रममा सम्मानित व्यक्ति कर्माचार्यले प्रशंसा(पत्र बितरण गरेका थिए ।


