
काठमाडौं — हिन्दू धर्मावलम्बीहरूको दोस्रो ठूलो पर्व तिहार आज शनिबारदेखि सुरु भएको छ। कात्तिक कृष्ण त्रयोदशीदेखि पाँच दिनसम्म मनाइने तिहारको पहिलो दिन आज काग तिहार मनाइँदैछ।
यमराजको सन्देशवाहकका रूपमा कागलाई मान्ने धार्मिक विश्वासअनुसार आज कागलाई मिठा–मिठा खानेकुरा खुवाउने चलन छ। कागले सधैँ शुभ समाचार ल्याओस् भन्ने कामनासहित घर–आँगनमा कागलाई पूजा गरी खानेकुरा दिने गरिन्छ।
तिहारको पहिलो दिनदेखि नै यमपञ्चक सुरु हुने विश्वास छ। धार्मिक मान्यताअनुसार यस अवधिमा यमराज आफ्नी बहिनी यमुनाको घरमा पाहुना लागेर बस्ने भएकाले तिहारलाई यमपञ्चक पनि भनिन्छ।
यसै दिन आयुर्वेद चिकित्साका पिता धनवन्तरीको स्मरण गर्दै धनवन्तरी जयन्ती समेत मनाइन्छ। धन, स्वास्थ्य र समृद्धिको कामनासहित विभिन्न धार्मिक विधि तथा पूजाआजा गर्ने परम्परा रहेको छ।
काग तिहारसँगै सुरु भएको तिहारका आगामी दिनमा क्रमशः कुकुर तिहार, गाई तिहार तथा लक्ष्मीपूजा, म्हः पूजा र भाइटीका मनाइनेछ।


