
काठमाडौँ । नेपालमा पश्चिमी वायुको आंशिक प्रभाव देखिन थालेसँगै देशका केही भूभागमा बदलीको अवस्था रहेको छ। मौसम पूर्वानुमान महाशाखाका अनुसार हिमाली क्षेत्र तथा कोशी प्रदेशका पहाडी भूभागमा आंशिक बादल लागेको छ भने तराईका केही स्थानमा तुवाँलो देखिएको छ।
महाशाखाका अनुसार आज दिउँसो कोशी प्रदेशसहित बागमती, गण्डकी र लुम्बिनी प्रदेशका हिमाली तथा पहाडी क्षेत्रमा आंशिक बदली रहनेछ। अन्य भूभागमा भने मौसम सामान्यतया सफा रहने अनुमान गरिएको छ।
कोशी प्रदेशका हिमाली तथा पहाडी क्षेत्र र गण्डकी प्रदेशको हिमाली भूभागका एक–दुई स्थानमा हल्का वर्षासँगै हिमपात हुन सक्ने सम्भावना रहेको छ।
यस्तै, आज राति कोशी, बागमती र गण्डकी प्रदेशका हिमाली तथा पहाडी क्षेत्रमा आंशिक बदली रहनेछ। लुम्बिनी प्रदेशको हिमाली भूभागमा पनि आंशिक बादल लाग्ने महाशाखाले जनाएको छ। रातिको समयमा कोशी र गण्डकी प्रदेशका हिमाली क्षेत्रका एक–दुई स्थानमा हल्का वर्षा र हिमपातको सम्भावना छ।
महाशाखाका अनुसार बुधबार पनि कोशी र गण्डकी प्रदेशका हिमाली भूभागका केही स्थानमा हल्का वर्षा तथा हिमपात हुन सक्नेछ।


