काठमाडौ ।नेपाल स्पोर्ट्स फोरम (एनएसएफ) ग्रुपले अमेरिकामा बस्दै आएका पूर्व एथलेटिक्स खेलाडी यज्ञलाल श्रेष्ठलाई सम्मान गरेको छ । आज बिहान भएको एक कार्यक्रममा अमेरिकास्थित हिमालयन फाउण्डेशनका संस्थापक अध्यक्ष तथा समाजसेवीसमेत रहेका श्रेष्ठलाई एनएसएफका अध्यक्ष एसपी त्रिपाठीले दोसल्ला ओडाई सम्मानपत्र प्रदान गरेका थिए ।
कार्यक्रममा पूर्व खेलाडी श्रेष्ठले एनएसएफद्वारा सम्मान पाएकोमा खुसी व्यक्त गरेका थिए । अन्तर्राष्ट्रियस्तरबाट खेलकुदमा पदक पाउदासमेत खेलकुद परिषद्का तत्कालिन पदाधिकारीहरुले भने कुनै वास्ता नगरेकोमा दुखेसो पोख्दै उनले भने, ‘यो सम्मान जस्तै आजभन्दा २० वर्ष अगाडि नेपालमा खेलकुदबाट सम्मान पाएको भए म कत्ति खुसी हुने थिए ।’ नेपालको खेलकुद विकासको निम्ति भौतिक निर्माण र खेलाडीको स्तरवृद्धिको लागि हिमालयन फाउण्डेशनमार्फत विभिन्न आर्थिक सहयोग गर्दै आएका श्रेष्ठले हालै पोखरामा ४० लाख बराबरको कभर्ड हल निर्माण गरेका छन् ।
कार्यक्रममा अमेरिकाबाट आएका लाइन्स क्लबका पूर्व अध्यक्ष समाजसेवी तिलक सुनुवारले अमेरिकामा समेत सामाजिक क्षेत्रमा विभिन्न सहयोग गर्दै आएका श्रेष्ठले सम्मान पाएको खुसी लागेको बताए ।
कार्यक्रममा ओएस नेपालका अमेरिकास्थित प्रतिनिधि तथा गोल्डेन मुभि मेकिङ्गका प्रबन्ध निर्देशक सन्दिप चौधरीले पूर्व खेलाडी श्रेष्ठको विभिन्न पाटोमध्ये एउटा महत्वपूर्ण पाटो खेललाई उठाएर सम्मान गरेकोमा एनएसएफ ग्रुपलाई धन्यवाद दिएका थिए । करिब १७ वर्ष अगाडि सय माइल दौड पूरा गरी दोस्रो स्थान हासिल गरेका श्रेष्ठको अमेरिकामा रहेका नेशनल दैनिक र त्यहाँका स्थानीय पत्रपत्रिकाहरुमा तस्विरसहित समाचारहरु प्रकाशित भएको स्मरण गर्दै चौधरीले त्यस्तो व्यक्तिलाई एनएसएफ ग्रुपले उहाँको योगदानको कदर गर्दै सम्मान गर्नु भएकोमा खुसी लागेको बताए ।
त्यसैगरी, अमेरिकाबाट आएका हिमालयन फाउण्डेशनका उपाध्यक्ष दावा शेर्पाले श्रेष्ठलाई सम्मान गरेकोमा एनएसएफ ग्रुपलाई धन्यवाद र श्रेष्ठलाई बधाई ज्ञापन गरेका थिए ।
यूनेस्को क्लबहरुको महासंघका अध्यक्ष आनन्दराज त्रिपाठीले राज्यले खेलकुद क्षेत्रमा जुन प्रकारले सहयोग गर्नुपर्ने थियो, त्यो नगरेको गुनासो गरे । साथै, उनले खेलकुद क्षेत्रमा श्रेष्ठले आर्थिक रुपमा ठूलो सहयोग गरेकोलाई प्रशंसा गरेका थिए ।
खेलक्षेत्रबाट विभिन्न खेलकर्मीहरुको उपस्थितिमा भएको उक्त कार्यक्रमको संचालन एनएसएफ ग्रुपका सदस्य एवं पूर्व खेलाडी डिएन घिसिङले गरेका थिए ।
२०८२ बैशाख ३० - मंगलवार
